بھٹکل (فکروخبر نیوز) نوجوان نسل میں منشیات کے بڑھتے خطرات کے تعلق سے بیداری پیدا کرنے اور انہیں نشے کی تباہ کاریوں سے محفوظ رکھنے کے مقصد سے بھٹکل مسلم یوتھ فیڈریشن کے زیر اہتمام گزشتہ رات مدینہ ویلفیئر سوسائٹی کی عمارت میں ایک خصوصی بیداری پروگرام منعقد کیا گیا۔ اس موقع پر اورنگ آباد سے آئے ہوئے ڈاکٹروں اور ماہرین نے منشیات کے استعمال سے پیدا ہونے والے جسمانی، ذہنی اور سماجی مسائل پر روشنی ڈالتے ہوئے نوجوانوں کو نشہ آور اشیاء سے دور رہنے اور صحت مند زندگی اختیار کرنے کی تلقین کی۔
پروگرام کا آغاز تلاوتِ قرآن سے ہوا جس کے بعد بھٹکل مسلم یوتھ فیڈریشن کے جنرل سکریٹری جناب مبشر حسین ہلارے نے فیڈریشن کا تعارف پیش کیا اور اورنگ آباد سے تشریف لانے والے مہمانوں کا استقبال کرتے ہوئے ان کی آمد پر خوشی کا اظہار کیا۔
اس موقع پر اورنگ آباد سے آئے ہوئے مہمان جناب جنید فاروقی نے منشیات کی لت اور اس کے نتیجے میں پیدا ہونے والے مختلف مسائل پر تفصیلی روشنی ڈالی۔ انہوں نے کہا کہ منشیات کا استعمال محض ایک فرد کی صحت کا مسئلہ نہیں، بلکہ اس کے اثرات اس کی ذاتی زندگی، خاندان اور معاشرے پر بھی مرتب ہوتے ہیں۔ اس لیے نوجوان نسل کو اس خطرے سے آگاہ کرنا اور انہیں نشے سے محفوظ رکھنے کے لیے بیداری پیدا کرنا نہایت ضروری ہے۔
جنید نے بھٹکل میں منشیات کے خلاف جاری بیداری کوششوں کا تذکرہ کرتے ہوئے کہا کہ شہر کے مختلف مقامات پر منشیات سے بچاؤ کے پیغامات پر مشتمل بورڈ آویزاں کیے گئے ہیں۔ ان کے مطابق ان بورڈوں کی موجودگی اس بات کی عکاسی کرتی ہے کہ مقامی محکمہ پولیس منشیات کے مسئلے کو سنجیدگی سے لے رہا ہے اور خصوصاً نوجوانوں کو اس لت سے بچانے کے لیے کوششیں کررہا ہے۔ انہوں نے کہا کہ منشیات کا مسئلہ اس قدر توجہ طلب ہوچکا ہے کہ حکومت نے بھی پولیس کو اس کی روک تھام کی ذمہ داری سونپی ہے اور پولیس اہلکار اس سلسلے میں محنت کررہے ہیں۔ جنید نے اس بات کی طرف بھی توجہ دلائی کہ منشیات کے خلاف جدوجہد کو صرف پولیس اور سرکاری اداروں کی ذمہ داری سمجھنا کافی نہیں، بلکہ نوجوانوں، والدین، تعلیمی اداروں اور سماجی تنظیموں میں بھی اس مسئلے کے تعلق سے شعور پیدا ہونا ضروری ہے۔
پروگرام میں شریک ڈاکٹروں اور ماہرین نے نشہ آور اشیاء کے استعمال سے صحت پر پڑنے والے منفی اثرات کے بارے میں معلومات فراہم کیں۔ انہوں نے واضح کیا کہ نشے کی لت انسان کی صحت کے ساتھ اس کی تعلیم، روزمرہ زندگی اور مستقبل پر بھی منفی اثرات ڈال سکتی ہے۔
اس موقع پر نوجوانوں کو منشیات سے دور رہنے، اپنی صحت کی حفاظت کرنے اور اپنی صلاحیتوں کو مثبت سرگرمیوں میں استعمال کرنے کی اہمیت سے آگاہ کیا گیا۔
اسٹیج پر فیڈریشن اور پیامِ انسانیت بھٹکل یونٹ کے ذمہ داران موجود تھے۔
