بھٹکل(فکروخبرنیوز) جماعت المسلمین بھٹکل کا سالانہ اجلاسِ عام کل بروز جمعہ بعد عشاء جامع مسجد بھٹکل میں منعقد ہوا جس میں اتحاد و اتفاق کی فضا قائم رکھنے پر زور دیا گیا اور جماعتی سرگرمیوں کی تفصیلات بھی حاضرین کے سامنے بیان کی گئی۔
مہتمم جامعہ مولانا مقبول احمد ندوی نے اپنے خطاب میں اجتماعیت سے جڑے رہنے کی نصیحت کی خصوصاً خواتین میں اسلامی بیداری لانے کی کوششوں پر زور دیا۔ واضح کیا کہ گھر کا ماحول درست کرنے اور آنے والی نسلوں کے ایمان و اخلاق کی حفاظت کے لیے خواتین میں اسلامی شعور بیدار کرنا وقت کا سب سے اہم تقاضا ہے۔ اس مقصد کے لیے گھریلو سطح پر تعلیم و تربیت کا ماحول بنانے اور جدید دور کے فتنوز سے بچوں کو محفوظ رکھنے کے لیے ماؤں اور بہنوں کی فکری بیداری پر نہایت ضروری ہے ۔مولانا نے حالاتِ حاضرہ اور بدلتے موسم پر اپنی تشویش کا اظہار کرتے ہوئے اپنے گناہوں کو یاد کرکے اللہ سے رجوع کرنے اور استغفار کی کثرت کی نصحیت کی۔
ان سے قبل نائب صدر اول مولانا عبدالمتین منیری نے رسم ورواج کی روک تھام میں جماعت کی کارگردی کا ذکر کیا، انہوں نے یہاں کے مسلمانوں کی خصوصیت بیان کرتے ہوئے کہا کہ وہ معاملات کے حل کے لیے سرکاری عدالتوں کا رخ نہیں کرتے بلکہ اپنے نجی معاملات جماعت کے فیصلوں کی روشنی میں حل کرتے ہیں۔
جنرل سکریٹری محی الدین رکن الدین نے سالانہ رپورٹ پیش کی جس میں جماعت کی سرگرمیوں کی تفصیلات بیان کی اور آئندہ کے منصوبوں سے واقف کرایا۔
محاسب جماعت جناب پلور صادق صاحب نے حساب کتاب کی تفصیلات حاضرین کے سامنے رکھی۔
آخر میں صدرِ جماعت جناب ماسٹر شفیع صاحب نے جماعت کی تاریخ اور ان کے لیے اپنی بے لوث خدمات پیش کرنے والوں کا خصوصی تذکرہ کیا اور آپس میں اتحادواتفاق قائم رکھنے پر بھپی زور دیا۔
واضح رہے کہ اجلاس کا آغاز قاری احمد رکن الدین کی تلاوت سے ہوا اور نعت حافظ عبدالہادی نے پیش کی۔ نظامت کے فراض نائب سکریٹری سید احمد سالک برماور ندوی نے انجام دیئے۔ نائب قاضی اول مولانا محمد انصار ندوی مدنی کی دعا پر یہ اجلاس اپنے اختتام کو پہنچا۔
