بھٹکل(فکروخبرنیوز) بھٹکل اور اس کے اطراف و اکناف میں جاری بارش کی شدید کمی اور اس کے نتیجے میں پیدا ہونے والی پانی کی قلت اور دیگر مشکلات کے پیشِ نظر شہر کے قاضیان کی جانب سے تمام مسلمانوں اور ائمہ مساجد کے نام ایک اہم ہدایت نامہ اور اپیل جاری کی گئی ہے۔
جماعت المسلمین بھٹکل کے قاضی مولانا عبدالرب خطیبی ندوی اور مرکزی خلیفہ جماعت المسلمین بھٹکل کے قاضی مولانا خواجہ معین الدین اکرمی ندوی نے ایک مشترکہ بیان جاری کرتے ہوئے کہا ہے کہ قرآن و حدیث کی روشنی میں گناہوں کی کثرت، زکوٰۃ کی ادائیگی میں کوتاہی اور حقوق العباد کی تلفی اللہ تعالیٰ کی ناراضگی اور رحمتِ الٰہی سے محرومی کا سبب بنتی ہے۔ قاضیانِ کرام نے تمام اہل اسلام سے اپیل کی ہے کہ وہ اس موقع پر کثرت سے توبہ و استغفار کریں، اپنے گناہوں کی معافی مانگیں، خصوصیت کے ساتھ صدقات و خیرات کا اہتمام کریں اور بارانِ رحمت کے لیے اللہ کے حضور عاجزانہ دعائیں کریں۔
اس کے ساتھ ہی قاضیانِ کرام نے تمام مساجد کے ائمہ کے نام خصوصی ہدایت جاری کرتے ہوئے کہا کہ وہ نمازِ فجر کی دوسری رکعت میں دعائے قنوتِ نازلہ کا اہتمام کریں اور بارش کے ساتھ ساتھ علاقے میں امن و عافیت اور حالات کی بہتری کے لیے دعا فرمائیں۔ ائمہ کرام کو یہ بھی ہدایت دی گئی ہے کہ وہ عام مصلیان اور عوام الناس کو بھی توبہ و استغفار، رجوع الی اللہ اور بارانِ رحمت کے لیے مسلسل دعا کرنے کی ترغیب دیں۔
