بھٹکل (فکروخبرنیوز): بھٹکل اور اطراف کے علاقوں میں رہنے والے گریجویٹ نوجوانوں کے لیے ایک اہم اور خوش آئند موقع فراہم کیا جارہا ہے۔ ملک کے سب سے باوقار اور چیلنجنگ مقابلہ جاتی امتحان یونین پبلک سروس کمیشن (UPSC) کی تیاری کے خواہشمند طلبہ مفت کوچنگ پروگرام کے لیے انٹرنس ایگزام اب بھٹکل ہی میں دے سکیں گے۔ اس مقصد کے لیے پہلی مرتبہ بھٹکل میں باقاعدہ انٹرنس ایگزام سینٹر قائم کیا گیا ہے۔
آئی ایچ ایس ایجوکیشن سوسائٹی، بھٹکل سینٹر کے ذمہ دار مولوی الیاس احمد برماور ندوی نے بتایا کہ یہ داخلہ امتحان 21 جون کو امیر شادی ہال، بھٹکل میں دوپہر 2 بجے سے شام 5 بجے تک منعقد ہوگا۔ انہوں نے کہا کہ ملک کی اعلیٰ ترین سول سروسز جیسے آئی اے ایس (IAS)، آئی پی ایس (IPS)، آئی ایف ایس (IFS) اور دیگر مرکزی خدمات میں کامیابی حاصل کرنے کے لیے UPSC کی تیاری انتہائی اہمیت رکھتی ہے، اور قوم کے نوجوانوں کو اس میدان میں آگے لانے کے لیے مختلف ادارے مسلسل کوششیں کر رہے ہیں۔
انہوں نے بتایا کہ حیدرآباد میں معروف ماہرِ تعلیم عبداللطیف خان کی نگرانی میں گزشتہ کئی برسوں سے باصلاحیت طلبہ کے لیے دو سالہ مفت UPSC کوچنگ پروگرام چلایا جا رہا ہے، جس میں نہ صرف معیاری کوچنگ فراہم کی جاتی ہے بلکہ رہائش، مطالعہ کا ماحول اور دیگر بنیادی سہولیات بھی بلا معاوضہ مہیا کی جاتی ہیں۔ اس پروگرام سے استفادہ کرتے ہوئے متعدد طلبہ مختلف سرکاری اور مسابقتی امتحانات میں نمایاں کامیابیاں حاصل کر چکے ہیں۔
مولوی الیاس ندوی نے کہا کہ بھٹکل میں داخلہ امتحان کا مرکز قائم ہونے سے مقامی طلبہ کو دور دراز شہروں کا سفر کرنے کی ضرورت نہیں رہے گی اور وہ اپنے ہی شہر میں امتحان دے کر اس سنہری موقع سے فائدہ اٹھا سکیں گے۔ انہوں نے نوجوانوں، خصوصاً ڈگری مکمل کر چکے طلبہ سے اپیل کی کہ وہ اس موقع کو ضائع نہ کریں اور قومی سطح کی خدمات میں اپنی نمائندگی مضبوط بنانے کے لیے اس پروگرام میں شرکت کریں۔ انہوں نے مزید بتایا کہ داخلہ امتحان کے لیے رجسٹریشن کی آخری تاریخ 20 جون مقرر کی گئی ہے۔ امیدوار آن لائن رجسٹریشن www.msexamportal.com/msias-2026 کے ذریعے کر سکتے ہیں، جبکہ مزید معلومات اور آف لائن رجسٹریشن کے لیے 9886073614 پر رابطہ کیا جا سکتا ہے
