بھٹکل(فکروخبرنیوز) انجمن حامئی مسلمین کے زیرِ انتظام چلنے والے اسلامیہ اینگلو اردو ہائی اسکول کے سینئر کنڑا معلم جناب عبدالرشید ہنشین مرد اپنی 28 سالہ طویل، مخلصانہ اور شاندار تعلیمی خدمات انجام دینے کے بعد آج بروز جمعرات 30/جولائی 2026 وظیفہ یاب ہوگئے۔ اس موقع پر اسکول میں ان کے اعزاز میں ایک پُروقار الوداعی تقریب کا انعقاد کیا گیا۔
تقریب سے خطاب کرتے ہوئے مقررین نے جناب عبدالرشید ہنشین مرد کی تدریسی خدمات، خوش اخلاقی، فرض شناسی اور طلبہ کی ہمہ جہتی رہنمائی کو خراجِ تحسین پیش کیا۔ مقررین نے کہا کہ انہوں نے اپنی اٹھائیس سالہ ملازمت کے دوران نہایت محنت، دیانت اور اخلاص کے ساتھ تدریسی فرائض انجام دیے اور ادارے کی ترقی میں نمایاں کردار ادا کیا۔
اس موقع پرجناب نور محمد(موجودہ صدر مدرس)، جناب شبیر دافعدار (سابق صدر مدرس ) ڈاکٹر عبدالحفیظ ندوی، مولانا اشرف معلم ، جناب الیاس پاشا، جناب عبدالناصر، جناب عبدالرشید مرزانکر ،جناب نعیم قاضی اور دیگر اساتذۂ کرام نے اپنے تاثرات پیش کرتے ہوئے سبکدوش ہونے والے معلم کی خدمات کو سراہا اور ان کی آئندہ زندگی کے لیے نیک تمناؤں کا اظہار کیا۔
اپنے تاثرات میں جناب عبدالرشید ہنشین مرد نے اپنی اٹھائیس سالہ تدریسی زندگی کی یادوں کا تذکرہ کرتے ہوئے انجمن حامئی مسلمین کے ذمہ داران، سابق و موجودہ صدر مدرسین، ساتھی اساتذہ اور اپنے تمام محسنین کا دلی شکریہ ادا کیا۔ انہوں نے کہا کہ دورانِ تدریس اگر ان سے دانستہ یا نادانستہ کسی کی دل آزاری یا کوئی کوتاہی ہوئی ہو تو وہ سب سے معذرت خواہ ہیں اور اپنی مغفرت و دعاؤں کی درخواست کرتے ہیں۔
تقریب کے اختتام پر اساتذۂ کرام کی جانب سے جناب عبدالرشید ہنشین مرد کی شال پوشی اور تہنیت کے ذریعے ان کی خدمات کا اعتراف کیا گیا،شکریہ کے کلمات کے ساتھ یہ باوقار تقریب اختتام پذیر ہوئی۔
