پٹنہ : حجاب تنازعہ کے باعث سرخیوں میں آنے والی ڈاکٹر نصرت پروین کو بہار کی نتیش حکومت نے ایک بار پھر ملازمت جوائن کرنے کا موقع دے دیا ہے۔ محکمہ صحت نے جمعہ 2 جنوری کو ان کی جوائننگ کی مدت میں توسیع کرتے ہوئے نئی آخری تاریخ 7 جنوری مقرر کر دی ہے۔
ڈاکٹر نصرت کو پہلے 20 دسمبر تک اپنی ڈیوٹی جوائن کرنی تھی، تاہم حجاب سے متعلق تنازعہ کے بعد وہ مقررہ وقت پر جوائن نہ کر سکیں۔ بعد ازاں حکومت نے انہیں 31 دسمبر تک مہلت دی تھی، لیکن اس تاریخ کو بھی انہوں نے ڈیوٹی جوائن نہیں کی، جس کے بعد محکمہ صحت نے ایک مرتبہ پھر مہلت میں توسیع کا اعلان کیا ہے۔
واضح رہے کہ 15 دسمبر کو وزیر اعلیٰ نتیش کمار نے منتخب ڈاکٹروں میں تقرری نامے تقسیم کیے تھے۔ اس تقریب کی ایک ویڈیو سوشل میڈیا پر وائرل ہوئی تھی جس میں وزیر اعلیٰ ڈاکٹر نصرت کا حجاب ہٹاتے ہوئے نظر آئے، جس کے بعد یہ معاملہ ملک بھر میں بحث کا موضوع بن گیا تھا۔
پٹنہ کے سرکاری طبی کالج و اسپتال کے پرنسپل ڈاکٹر محفوظ الرحمٰن کے مطابق ڈاکٹر نصرت کے اہل خانہ نے یقین دہانی کرائی تھی کہ وہ جلد ہی ڈیوٹی جوائن کریں گی، تاہم اب تک ان کی جوائننگ کی تصدیق نہیں ہو سکی ہے۔ ڈاکٹر نصرت اسی میڈیکل کالج میں فرسٹ ایئر کی پوسٹ گریجویٹ طالبہ بھی ہیں۔
قابلِ ذکر ہے کہ ڈاکٹر نصرت کا معاملہ اب محض سرکاری تقرری تک محدود نہیں رہا بلکہ ایک سیاسی موضوع کی شکل اختیار کر چکا ہے۔ بہار کے گورنر عارف محمد خان نے بھی انہیں ملازمت جوائن کرنے کا مشورہ دیا ہے جبکہ جھارکھنڈ کے وزیر صحت ڈاکٹر عرفان انصاری نے انہیں تین لاکھ روپے ماہانہ تنخواہ پر ملازمت کی پیشکش بھی کی ہے۔
اب سب کی نظریں 7 جنوری پر مرکوز ہیں کہ آیا ڈاکٹر نصرت اس آخری مہلت کے اندر اپنی ڈیوٹی جوائن کرتی ہیں یا نہیں۔