بھٹکل (فکروخبر نیوز) شہر کے الکوثر گرلز کالج میں آل انڈیا مسلم پرسنل لا بورڈ کے جنرل سکریٹری مولانا فضل الرحمن الرحیم مجددی کے دستِ مبارک سے محترمہ رشیدہ جوکاکو کے نام سے منسوب ہال کا افتتاح عمل میں آیا۔ اس موقع پر مولانا نے الکوثر گرلز اسکول کے احاطے میں خصوصی ضروریات رکھنے والے بچوں کے لیے قائم وژڈم اسکول کا بھی دورہ کیا اور طلبہ و اساتذہ سے ملاقات کرتے ہوئے ادارے کی تعلیمی سرگرمیوں کا جائزہ لیا۔
وژڈم اسکول کے دورے کے موقع پر مولانا فضل الرحمن الرحیم مجددی نے خصوصی ضروریات رکھنے والے بچوں کی تعلیم و تربیت کے لیے کی جانے والی کوششوں کو قابلِ تحسین قرار دیتے ہوئے کہا کہ ان بچوں کو تعلیمی میدان میں آگے بڑھانے کی فکر ایک اہم اور قابلِ قدر خدمت ہے۔ انہوں نے اسکول کے ذمہ داران کو مبارکباد پیش کرتے ہوئے اس مشن کو منظم منصوبہ بندی کے ساتھ مزید آگے بڑھانے پر زور دیا اور بچوں اور معلمہ کے لیے دعائے خیر کی۔
اس موقع پر رابطہ سوسائٹی کے جنرل سکریٹری عتیق الرحمن منیری نے اپنے خطاب میں کہا کہ وژڈم اسکول کے آغاز کے بعد خصوصی ضروریات رکھنے والے بچوں کو اسکول تک لانے لے جانے اور ان کی دیگر ضروریات کی تکمیل کے سلسلے میں ادارے کے ذمہ داران کو متعدد چیلنجز کا سامنا کرنا پڑا، تاہم انہوں نے حکمتِ عملی اور عزم کے ساتھ ان مسائل پر قابو پانے کی کوشش کی۔
واضح رہے کہ محترمہ رشیدہ جوکاکو نے انجمن حامیِ مسلمین بھٹکل میں کئی برس تک تدریسی خدمات انجام دیں۔ وہ تدریس سے وابستہ رہتے ہوئے پرنسپل کے منصب تک پہنچیں اور بعد ازاں انجمن کی ایڈوائزری کمیٹی کی مسلسل رکن بھی رہیں۔ ان کی تربیت یافتہ سینکڑوں طالبات آج مختلف شعبوں میں خدمات انجام دے رہی ہیں اور ان کے تعلیمی مشن کو آگے بڑھانے میں اپنا کردار ادا کر رہی ہیں۔
پروگرام کی نظامت مولانا سید یاسر برماور ندوی نے انجام دی، جبکہ تعارف اور استقبالیہ کلمات سید شکیل ایس ایم نے پیش کیے۔ اس موقع پر خلیجی ممالک کی جماعتوں کے ذمہ داران سمیت دیگر معزز شخصیات بھی موجود تھیں۔
