سرسی (فکروخبر نیوز) اترکنڑا ضلع کے سرسی تعلقہ میں شہد کی مکھیوں کے اچانک حملے میں ایک 86 سالہ بزرگ کی موت کا افسوسناک واقعہ پیش آیا ہے۔ یہ حادثہ بدھ 28 اکتوبر کو تعلقہ کے ہوسلّی علاقے کے قریب پیش آیا، جہاں گھر واپس جارہے بزرگ پر شہد کی مکھیوں کے جھنڈ نے حملہ کردیا۔ متعدد مکھیوں کے ڈنک لگنے سے بزرگ کی حالت بگڑ گئی اور انہوں نے موقع پر ہی دم توڑ دیا۔
موصولہ اطلاعات کے مطابق جاں بحق ہونے والے بزرگ کی شناخت سرسی تعلقہ کے وانلّی کے قریب واقع ہاوِن گدّے کے رہنے والے گنپتی تِمّا گوڈا (86) کے طور پر ہوئی ہے۔
بتایا جاتا ہے کہ گنپتی گوڈا بدھ کی صبح ہوسلّی میں کایاشیٹی کے مکان کے قریب واقع رام کرشنا ہیگڈے کے گھر سے اپنے مکان کی طرف پیدل روانہ ہوئے تھے۔ وہ ایک پگڈنڈی سے گزر رہے تھے کہ اچانک شہد کی مکھیوں کا ایک جھنڈ ان پر ٹوٹ پڑا۔
مکھیوں کے غیر متوقع حملے کے باعث بزرگ کو سنبھلنے کا موقع نہیں مل سکا اور متعدد مکھیوں نے انہیں ڈنک مار دیے۔
اس سلسلے میں درج کرائی گئی شکایت کے مطابق تقریباً 50 سے 60 مکھیوں نے گنپتی گوڈا کو ڈنک مارے، جس کے نتیجے میں ان کی طبیعت شدید خراب ہوگئی اور وہ جائے وقوعہ پر ہی انتقال کرگئے۔
اس افسوسناک واقعے کے سلسلے میں سرسی دیہی پولیس اسٹیشن میں معاملہ درج کرلیا گیا ہے۔
