رتناگیری (فکروخبرنیوز) مہاراشٹر کے ضلع رتناگیری کے تحت آنے والے راجا پور تعلقہ کے ناٹیکے نانارانگڵواڈی علاقے میں ایک انتہائی دل دہلا دینے والا حادثہ پیش آیا ہے۔ اپنی والدہ کے ساتھ کھاڑی کے کنارے سیپیاں پکڑنے کے لیے گیے ایک ہی خاندان کے پانچ کمسن بچے اچانک کھاڑی کے گہرے پانی کی زد میں آ کر ڈوب گئے۔ اس دردناک حادثے میں چار بچوں کی موت ہو گئی ہے، جبکہ ایک بچی کو مقامی لوگوں نے بروقت اقدام کرتے ہوئے محفوظ طریقے سے باہر نکال لیا۔
موصولہ تفصیلات کے مطابق نانارانگڵواڈی کے رہائشی جنید بھٹکر کی اہلیہ حنا بھٹکر اپنے بچوں کے ساتھ قریبی کھاڑی کے کنارے گئیں تھیں۔ بچے کنارے پر پانی کے قریب کھیل رہے تھے اور سیپیاں تلاش کر رہے تھے کہ اچانک شام کے وقت پانی کے اندر موجود ایک گہرے گڑھے کا اندازہ نہ ہونے کی وجہ سے پانچوں بچے ایک کے بعد ایک گہرے پانی میں چلے گئے اور غرقاب ہونے لگے۔ جس کو دیکھنے پر چیخ و پکار مچ گئی۔ بچوں کو ڈوبتا دیکھ کر قریبی علاقوں سے مقامی باشندے، ساحلی پولیس ناٹے اور امدادی ٹیمیں فوری طور پر موقعِ واردات پر پہنچ گئیں اور ریسکیو آپریشن شروع کیا۔ جاں بحق ہونے والے بچوں کی شناخت ماہرہ جنید بھٹکر(15) بشریٰ جنید بھٹکر(11) جویریہ جنید بھٹکر(9) اور محمد جنید بھٹکر(6) کی حیثیت سے کرلی گئی ہے۔
مقامی لوگوں نے انتھک جدوجہد کے بعد ایک بچی کو زندہ نکالنے میں کامیابی حاصل ہوئی جبکہ پانی میں ڈوبنے والے باقی بچوں میں سے محمد، زوہریہ اور بشریٰ کی لاشیں یکے بعد دیگرے برآمد کر لی گئیں اور چوتھی بچی ماہرہ کی تلاش کے لیے بڑے پیمانے پر سرچ آپریشن جاری رکھا گیا۔ اس اچانک اور المناک حادثے سے بھٹکر خاندان پر غم کا پہاڑ ٹوٹ پڑا ہے اور پورے ناٹیکے و راجا پور علاقے میں گہرے رنج و غم کا ماحول ہے۔ حکومتی کارروائی کے بعد تینوں بچوں کی لاشیں اہلِ خانہ کے حوالے کردی گئیں ہیں۔
