بھٹکل (فکروخبر نیوز) انجمن حامیٔ مسلمین کے زیرِ انتظام قائم انجمن کالج آف ایجوکیشن (بی ایڈ) بھٹکل کے انجمن آباد کیمپس میں 27 ستمبر کو ایک عظیم الشان ‘میگا ٹیچرز جاب فیئر 2026’ کا کامیاب انعقاد عمل میں آیا۔ اس روزگار میلے کا بنیادی مقصد تدریسی شعبے سے وابستہ باصلاحیت امیدواروں اور ریاست کرناٹک کے مختلف تعلیمی اداروں کو ایک مشترکہ پلیٹ فارم پرلانا تھا تاکہ مستحق اساتذہ کو برائے راست روزگار کے مواقع میسر آسکیں۔
اس روزگار ڈرائیو میں ریاست بھر سے تقریباً 200 تدریسی امیدواروں نے شرکت کی، جبکہ وجئے پورh، دھارواڑ، باگلکوٹ، رائچور، گدگ، کوپل اور اتر کنڑ سمیت مختلف اضلاع کے 21 سے زائد ممتاز تعلیمی اداروں نے اپنے نمائندے بھیجے۔ کلکیری، نرگنڈ، الکل، سندھنور، شیرول اور ہوناور جیسے علاقوں سے آئی اسکول انتظامیہ نے امیدواروں کے انٹرویوز لیے۔ منتظمین کے مطابق جاب فیئر میں شامل ہونے والے تقریباً 90 فیصد امیدواروں کو ملازمت کی پیشکش موصول ہوئی یا وہ انتخاب کے حتمی مراحل تک پہنچنے میں کامیاب رہے۔
مختلف اضلاع سے آئے تعلیمی اداروں کے نمائندوں نے انجمن بی ایڈ کالج کے منظم نظم و ضبط، طلبہ اور اساتذہ کی مہمان نوازی اور بہترین انتظامات کی ستائش کی۔ انہوں نے ایک ہی چھت کے نیچے بڑی تعداد میں اہل اور صلاحیت مند اساتذہ کی موجودگی کو ایک اہم پیش رفت قرار دیتے ہوئے مستقبل میں بھی ایسے پروگراموں میں شرکت کی خواہش ظاہر کی۔
اسے کامیاب بنانے میں کالج کے پرنسپل پروفیسر حسن باگیواڑی، پروفیشنل کالج بورڈ کے سکریٹری محتشم اہید شعیب، ایونٹ کوآرڈینیٹر عمران مانک، اور فیکلٹی کوآرڈینیٹرز پروفیسر سویتا کماری، پروفیسر حسن ڈونگری اور پروفیسر شرین کے علاوہ اسٹوڈنٹ کوآرڈینیٹر الیاس برماور نے کلیدی کردار ادا کیا۔
کالج انتظامیہ نے تمام رضاکار طلبہ اور عملے کی خدمات کا اعتراف کرتے ہوئے ان کا شکریہ ادا کیا۔ اس موقع پر انجمن حامیٔ مسلمین کے صدر جناب یونس قاضیا، جنرل سکریٹری جناب اسحاق شابندری اور دیگر اراکینِ ڈائریکٹرس کی سرپرستی اور رہنمائی کی خصوصی ستائش کی گئی۔ منتظمین نے اعلان کیا ہے کہ تعلیمی اداروں اور امیدواروں کے زبردست ردِعمل کو دیکھتے ہوئے انجمن بی ایڈ کالج اب ہر سال اس میگا جاب فیئر کا اہتمام کرے گا۔
