بھٹکل (فکروخبر نیوز) کرناٹک کے وزیر صحت یوٹی قادر اور کرناٹک اسمبلی کے نائب اسپیکر منکال وئیدیا کے اعزاز میں مجلس اصلاح و تنظیم کی جانب سے اتوار کی شب آمنہ پیلس میں ایک تہنیتی اجلاس منعقد ہوا، جس میں دونوں قائدین کی شال پوشی کے ساتھ سپاس نامے پیش کیے گئے۔ شہر کے مختلف اداروں اور تنظیموں کی جانب سے بھی دونوں رہنماؤں کی گل پوشی کرتے ہوئے ان کی خدمات کو سراہا گیا۔
اس موقع پر تنظیم کے صدر جناب عنایت اللہ شاہ بندری نے کہا کہ منکال وئیدیا نے علاقے کے لیے جو ترقیاتی کام کیے ہیں، ان کا اعتراف کیا جانا چاہیے، تاہم جو کام ابھی باقی ہیں انہیں بھی مکمل کرنے کی ضرورت ہے۔ تنظیم کے صدر نے اس بات پر زور دیا کہ عوام کو بنیادی سہولیات کی فراہمی حکومت اور منتخب نمائندوں کی اولین ذمہ داری ہے۔
قاضی جماعت المسلمین بھٹکل مولانا عبدالرب ندوی نے کہا کہ عوام کو اپنے نمائندوں سے بڑی امیدیں وابستہ ہوتی ہیں۔ لیڈر کا مطلب یہی ہے کہ وہ عوام کے لیے کام کرے اور انہیں ضروری سہولیات فراہم کرے۔ انہوں نے کہا کہ اگر عوام کی توقعات پوری نہ ہوں تو ان میں بددلی پیدا ہوسکتی ہے، جس کے سیاسی اثرات بھی سامنے آسکتے ہیں۔
جناب یونس قاضیا نے دونوں مہمانوں کا استقبال کرتے ہوئے ان کا شکریہ ادا کیا۔ انہوں نے یوٹی قادر کی انتخابی کامیابیوں کا ذکر کرتے ہوئے کہا کہ ان کی مسلسل محنت اور قوم و عوام کی خدمت کا جذبہ انہیں اس مقام تک لے کر آیا ہے۔ منکال وئیدیا سے مخاطب ہوتے ہوئے انہوں نے کہا کہ آپ کے ذریعہ کیے گئے بعض وعدے ابھی پورے نہیں ہوئے، ہماری عوام نوکریاں نہیں بلکہ اچھی سڑکیں اور صفائی ستھرائی چاہتی ہے۔ آپ کے پاس اب تقریباً ڈیڑھ سال کا وقت باقی ہے، اس دوران آپ کو ان کاموں کی تکمیل کے لیے بھرپور توجہ دینی ہوگی۔ جناب یونس قاضیا نے مزید کہا کہ عوامی نمائندوں کی جانب سے کیے گئے وعدوں کو عملی جامہ پہنانا ضروری ہے تاکہ عوام کا اعتماد برقرار رہے۔
اپنے خطاب میں نائب اسپیکر منکال وئیدیا نے اپنے دور میں انجام دیے گئے مختلف ترقیاتی کاموں کا تذکرہ کیا اور یقین دلایا کہ جو کام باقی رہ گئے ہیں، انہیں بارش کا موسم ختم ہوتے ہی شروع کیا جائے گا۔ انہوں نے کرناٹک حکومت کی پانچ گارنٹی اسکیموں کا بھی ذکر کیا اور کہا کہ ان اسکیموں سے ریاست کے غریب اور مستحق طبقات کو فائدہ پہنچ رہا ہے۔
کرناٹک کے وزیر صحت یوٹی قادر نے کہا کہ بھٹکل کی عوام ترقیاتی کام چاہتے ہیں اور حکومت بھی اس سمت میں کوشاں ہے۔ انہوں نے یقین دلایا کہ وزیر کی حیثیت سے بھٹکل کی ترقی کے لیے ان کی جانب سے جو ممکن ہوگا، وہ تعاون کریں گے۔ انہوں نے عوام سے منکال وئیدیا کو مسلسل کامیاب بنانے کی اپیل کرتے ہوئے کہا کہ تسلسل کے ساتھ منتخب ہونے والے نمائندے ہی ترقیاتی کاموں کو آگے بڑھا سکتے ہیں۔ انہوں نے کہا کہ اگر منکال وئیدیا کو تین مرتبہ کامیاب کیا جائے تو عوام کے تمام مسائل حل ہوں گے۔
یوٹی قادر نے بنگلورو کے حج ہاؤس میں اسلامی تاریخ پر مشتمل ایک بین الاقوامی میوزیم قائم کرنے کے سلسلے میں جاری کوششوں کا بھی ذکر کیا۔ انہوں نے بھٹکل کے سرکاری اسپتال میں مدر اینڈ چائلڈ کیئر سہولت قائم کرنے کا عندیہ دیتے ہوئے کہا کہ بھٹکل کی سڑکوں پر تمام مذاہب کے لوگ امن و امان کے ساتھ مل جل کر چلیں، یہ بھی شہر کی ترقی کی ایک اہم علامت ہے۔
اس موقع پر یوٹی قادر کے لیے سپاس نامہ جناب آفتاب کولا نے جبکہ منکال وئیدیا کے لیے سپاس نامہ تنظیم کے نائب صدر جناب قمر سعدا نے پیش کیا۔ شہر کے مختلف اداروں کی جانب سے دونوں قائدین کی گل پوشی بھی کی گئی۔
پروگرام کے آخر میں تنظیم کے جنرل سکریٹری مولانا عزیز الرحمن رکن الدین ندوی نے اظہارِ تشکر پیش کیا۔ نظامت فرائض ایڈوکیٹ عمران لنکا نے انجام دیئے۔
