کاروار (فکروخبر نیوز) ضلع اتر کنڑا میں مسلسل بارش اور محکمہ موسمیات کی جانب سے جاری ریڈ الرٹ کے پیشِ نظر ضلع انتظامیہ نے احتیاطی اقدام کے طور پر پانچ تعلقوں میں تمام آنگن واڑی مراکز، پرائمری اور ہائی اسکولوں کو ایک دن کے لیے بند رکھنے کا فیصلہ کیا ہے۔ ڈپٹی کمشنر نے سرکاری حکم نامہ جاری کرتے ہوئے 7 جولائی کو سرسی، سداپور، یلاپور، جوئیڈا اور داندیلی تعلقوں کے تعلیمی اداروں میں تعطیل کا اعلان کیا ہے۔
محکمہ موسمیات (IMD) کی پیش گوئی کے مطابق ضلع میں آئندہ دو روز کے دوران شدید بارش، تیز ہواؤں اور خراب موسمی حالات کا امکان ہے، جس کے باعث طلبہ کے تحفظ اور آمد و رفت میں ممکنہ دشواریوں کو مدنظر رکھتے ہوئے یہ فیصلہ کیا گیا ہے۔
ضلع ڈپٹی کمشنر نے ڈیزاسٹر مینجمنٹ ایکٹ 2005 کے تحت حاصل اختیارات کا استعمال کرتے ہوئے یہ حکم جاری کیا ہے اور متعلقہ محکموں کو اس پر مؤثر عمل درآمد کی ہدایت دی ہے۔ انتظامیہ نے واضح کیا ہے کہ تعطیل کے باعث ہونے والے تعلیمی نقصان کی تلافی کے لیے بعد میں اضافی کلاسوں کا انعقاد کیا جائے گا۔
اس سلسلے میں محکمہ ترقیِ نسواں و اطفال اور محکمہ عوامی تعلیم کو ضروری ہدایات جاری کر دی گئی ہیں۔ انتظامیہ نے عوام سے بھی اپیل کی ہے کہ خراب موسمی حالات کے دوران احتیاطی تدابیر اختیار کریں اور غیر ضروری سفر سے گریز کریں۔
