بھٹکل (فکروخبرنیوز) انجمن حامیِ مسلمین بھٹکل کے زیرِ انتظام چلنے والے انجمن انسٹی ٹیوٹ آف ٹیکنالوجی اینڈ مینجمنٹ (AITM) میں اتوار کے روز 46 واں سالانہ جلسہ کا انعقاد عمل میں آیا۔ اس پروقار تقریب میں فارغ التحصیل طلبہ، ان کے سرپرستوں، اساتذہ، نان ٹیچنگ اسٹاف، مجلسِ انتظامیہ کے اراکین، قدیم طلبہ اور دیگر معزز مہمانوں نے کثیر تعداد میں شرکت کی۔
پروگرام کا آغاز تلاوت کلام پاک ہوا جس کے بعد کالج کے پرنسپل ڈاکٹر کے فضل الرحمن نے استقبالیہ کلمات پیش کیے جس میں انہوں نے کالج کی سالانہ تعلیمی و انتظامی رپورٹ بھی پیش کی۔ کالج کے رجسٹرار پروفیسر زاہد کھروری نے مہمانانِ خصوصی کا تعارف کرایا۔
تقریب میں بطورِ مہمانِ خصوصی مدعو ‘چنار کوانٹم اے آئی’ کے چیف آپریٹنگ آفیسر (COO) شاہد عباس میر نے اجتماع سے خطاب کرتے ہوئے جدید دور کی ایجادات، ابھرتی ہوئی ٹیکنالوجی اور صنعتی ضروریات کے مطابق خود کو تیار کرنے کی اہمیت پر تفصیلی روشنی ڈالی۔ اعزازی مہمان، چنار کوانٹم اے آئی کے چیف انوویشن آفیسر گوکل بی الیکس نے فارغ التحصیل طلبہ کو مستقل سیکھنے اور کاروباری صلاحیتوں (Entrepreneurship) کو اپنانے کی ترغیب دی۔
اس موقع پر تعلیمی اداروں اور صنعت کے درمیان روابط کو مستحکم بنانے کے لیے ایک اہم پیش رفت بھی سامنے آئی، جہاں AITM اور چنار کوانٹم کے درمیان مفاہمتی یادداشت (MoU) پر دستخط کیے گئے۔ اس معاہدے کے ذریعے طلبہ کو صنعتی تربیت، انٹرنشپ، تحقیق اور روزگار کے بہتر مواقع فراہم کرنے کی راہ ہموار ہوگی۔
تقریب کے دوران تعلیمی، کھیلوں اور دیگر ہم نصابی سرگرمیوں میں نمایاں کارکردگی کا مظاہرہ کرنے والے طلبہ کو خصوصی انعامات اور اسناد سے نوازا گیا۔
تقریب کی صدارت کرتے ہوئے انجمن حامیِ مسلمین بھٹکل کے نائب صدر محمد صادق پلور نے معیاری تعلیم کے فروغ اور طلبہ کی ہمہ جہت شخصیت سازی کے لیے انجمن کے عزم کا اعادہ کیا۔ بعد ازاں پرنسپل ڈاکٹر کے فضل الرحمن نے فارغ التحصیل طلبہ سے حلف لیا، جس کے بعد انجینئرنگ (BE)، ایم بی اے (MBA) اور ایم سی اے (MCA) کے طلبہ میں ڈگریاں اور اسناد تقسیم کی گئیں۔
پروگرام کے کنوینر اور شعبۂ الیکٹرانکس اینڈ کمیونیکیشن انجینئرنگ کے سربراہ ڈاکٹر کرن وی شانبھاگ نے تمام مہمانوں اور شرکاء کا شکریہ ادا کیا۔ تقریب کا اختتام قومی ترانے پر ہوا۔
اس موقع پرانجمن حامیِ مسلمین کے ذمہ داران، جن میں جنرل سکریٹری محمد اسحاق شاہ بندری، کالج انتظامیہ کمیٹی کے سکریٹری محمد انصار دمدا ابو، نائب صدر ڈاکٹر زبیر کولا، ایڈیشنل جنرل سکریٹری محمد اسماعیل جوکاکو اور دیگر عہدیداران وغیرہ موجود تھے۔ پروگرام کی نظامت پروفیسر سریشیل بھٹ، محمد ایاد اور محمد زید نے مشترکہ طور پر انجام دی۔
