ساحلی کرناٹک کے اضلاع جنوبی کینرا، اڈپی میں منگل کی رات گرج چمک اور تیز ہواؤں کے ساتھ ہونے والی بے موسم بارش نے جہاں شدید گرمی سے راحت فراہم کی ہے، وہیں کئی مقامات پر تباہی مچائی۔ منگلورو شہر سمیت بیلتنگڈی، سُلیا، بنٹوال اور پتور میں رات کے وقت موسلا دھار بارش ریکارڈ کی گئی۔ محکمہ موسمیات (IMD) نے ساحلی اضلاع میں اگلے تین دنوں تک مزید بارش اور طوفانی موسم کی پیش گوئی کرتے ہوئے الرٹ جاری کیا ہے۔
اڈپی اور بنٹوال میں بجلی کا نظام متاثر:
اڈپی شہر اور گرد و نواح کے علاقوں میں رات ساڑھے نو بجے کے قریب شروع ہونے والی طوفانی بارش اور کڑکتی بجلی کی وجہ سے بجلی کا نظام مکمل طور پر درہم برہم ہو گیا۔ بنٹوال کے بی سی روڈ اور دیگر علاقوں میں بھی کئی گھنٹوں تک برقی رو منقطع رہی۔ منگلورو میں منگل کے روز زیادہ سے زیادہ درجہ حرارت 34.8 ڈگری سیلسیئس ریکارڈ کیا گیا تھا، جس کے بعد شام کو اچانک موسم نے کروٹ لی۔
موڈبیدری اور کارکلا میں نقصانات:
موڈبیدری میں تیز ہواؤں نے شدید نقصان پہنچایا، جہاں تھاکوڈے پوسٹ آفس کی چھت کی ٹائلیں اڑ گئیں اور بارش کا پانی دفتر میں داخل ہو گیا۔ خوش قسمتی سے اہم دستاویزات محفوظ رہیں۔ مرور گاؤں میں ایک مکان کی چھت اڑ گئی جبکہ دوسرے مکان پر درخت گرنے سے جزوی نقصان پہنچا۔ کارکلا تعلقہ کے ایڈو اور منڈکور دیہاتوں میں آسمانی بجلی گرنے سے دو مکانات کو شدید مالی نقصان پہنچا ہے، جس کا تخمینہ ہزاروں روپے لگایا گیا ہے۔ ریونیو حکام نے متاثرہ مقامات کا دورہ کر کے نقصانات کا جائزہ لیا ہے۔
