منگلورو(فکروخبرنیوز) موڈبدری میں پیش آئے ایک دلخراش اور انتہائی افسوسناک واقعہ میں بجلی کے کرنٹ کی زد میں آنے والے اپنے جوان بیٹے کو بچانے کی کوشش میں ماں بھی موت کے منہ میں چلی گئی۔ اس حادثے میں ماں اور بیٹا دونوں موقع پر ہی جاں بحق ہو گئے، جس سے پورے علاقے میں سوگ کی لہر دوڑ گئی ہے۔
موصولہ اطلاعات کے مطابق موڈبدری کے پلڈکا گرام پنچایت کے تحت ورنابیٹو کے رہائشی 18 سالہ شون جو کہ مقامی ہولی روزری کالج کا طالب علم تھا، جمعرات کی صبح گھر کے پاس تار پر سوکھنے کے لیے ڈالے گئے کپڑے اٹھا رہا تھا۔ اسی دوران مبینہ طور پر وہاں سے گزرنے والی ہائی ٹینشن بجلی کی لائن کپڑے سکھانے والی تار کے رابطے میں آ گئی، جس کی وجہ سے شون شدید کرنٹ کی زد میں آ گیا۔
بیٹے کو تڑپتا دیکھ کر پاس ہی موجود اس کی 45 سالہ ماں مرسی مسکارینہاس فورا بیٹے کو بچانے کے لیے دوڑیں، لیکن افسوس کہ وہ بھی بجلی کے شدید کرنٹ کی زد میں آ گئیں اور دونوں موقع پر ہی دم توڑ گئے۔ اس المناک حادثے کا انکشاف اس وقت ہوا جب ان کے گھر کے قریب واقع باغیچے میں کام کرنے والے مزدوروں نے جمعرات کی صبح ماں اور بیٹے کو مردہ حالت میں زمین پر پڑے دیکھا۔ واقعے کی اطلاع ملتے ہی موڈبدری پولیس موقع پر پہنچی اور معائنہ کرنے کے بعد مقامی پولیس اسٹیشن میں معاملہ درج کر کے مزید قانونی کارروائی شروع کر دی ہے۔
