چکمگلورو (فکروخبرنیوز) کرناٹک کے ضلع چکمگلور کے ایک شخص آن لائن ٹریڈنگ کے نام پر بڑے مالی فراڈ کا شکار ہو گیا، جہاں اسے مبینہ طور پر 1.28 کروڑ روپے سے محروم کر دیا گیا۔
پولیس کے مطابق، متاثرہ شخص کو سوشل میڈیا پلیٹ فارم فیس بک پر "FYERS” کے نام سے ایک ٹریڈنگ اشتہار نظر آیا، جس کے بعد اسے "F-8FYERS Securities” کے عنوان سے ایک WhatsApp گروپ میں شامل کیا گیا۔ گروپ میں موجود افراد نے غیر معمولی منافع کا لالچ دے کر متاثرہ کو سرمایہ کاری پر آمادہ کیا۔
دھوکہ بازوں کی باتوں پر یقین کرتے ہوئے متاثرہ نے مختلف مراحل میں مجموعی طور پر 1 کروڑ 28 لاکھ 10 ہزار روپے منتقل کر دیے۔ لیکن وعدوں کے برخلاف نہ کوئی منافع ملا اور نہ ہی اصل رقم واپس کی گئی۔ جب متاثرہ نے اپنی رقم نکالنے کی بار بار کوشش کی تو اسے ناکامی کا سامنا کرنا پڑا، جس کے بعد اسے دھوکہ دہی کا احساس ہوا۔
واقعہ سامنے آنے کے بعد متاثرہ نے سائبر پولیس سے رجوع کیا، جس پر مقدمہ درج کر کے تحقیقات شروع کر دی گئی ہیں۔ پولیس اس فراڈ میں ملوث افراد کی تلاش میں مصروف ہے۔
پولیس نے عوام کو خبردار کرتے ہوئے کہا ہے کہ سوشل میڈیا پر آنے والی سرمایہ کاری کی پرکشش پیشکشوں سے ہوشیار رہیں اور کسی بھی اسکیم میں رقم لگانے سے قبل اس کی مکمل جانچ پڑتال ضرور کریں، تاکہ اس طرح کے دھوکہ دہی کے واقعات سے بچا جا سکے۔