متحدہ عرب امارات کے صدر شیخ محمد بن زاید النہیان 19 جنوری کو ہندوستان کا دورہ کریں گے۔ یہ دورہ وزیر اعظم نریندر مودی کی دعوت پر ہو رہا ہے، جس کا مقصد بھارت اور یو اے ای کے درمیان تیزی سے فروغ پاتی جامع اسٹریٹجک شراکت داری کو مزید مضبوط بنانا ہے۔
وزارتِ خارجہ (MEA) کے مطابق، شیخ محمد بن زاید کا یہ ہندوستان کا تیسرا دورہ ہوگا، جبکہ بطور صدر یہ ان کا پانچواں دورہ ہے۔ یہ دورہ حالیہ برسوں میں دونوں ممالک کے درمیان اعلیٰ سطحی تبادلوں کے تسلسل کا حصہ ہے، جس نے دو طرفہ تعلقات کو نئی رفتار دی ہے۔
وزارتِ خارجہ نے بتایا کہ ستمبر 2024 میں ابوظہبی کے ولی عہد شیخ خالد بن محمد بن زاید النہیان، اپریل 2024 میں دبئی کے ولی عہد اور متحدہ عرب امارات کے نائب وزیر اعظم و وزیر دفاع شیخ حمدان بن محمد بن راشد آل مکتوم کے ہندوستانی دوروں نے اس مضبوط رابطے کو مزید تقویت دی ہے۔
بھارت اور متحدہ عرب امارات کے درمیان تعلقات گرمجوش، مستحکم اور کثیر جہتی ہیں، جن کی بنیاد مضبوط سیاسی، ثقافتی اور اقتصادی روابط پر قائم ہے۔ دونوں ممالک ایک دوسرے کے اہم تجارتی اور سرمایہ کاری شراکت داروں میں شامل ہیں۔ جامع اقتصادی شراکت داری معاہدہ (CEPA)، مقامی کرنسی کے تصفیے کا نظام (LCS) اور دو طرفہ سرمایہ کاری کے معاہدے نے ان تعلقات کو مزید مضبوط کیا ہے۔
توانائی کے شعبے میں بھی دونوں ممالک کے درمیان قریبی تعاون موجود ہے، جہاں طویل مدتی توانائی کی فراہمی کے معاہدے اس شراکت داری کا اہم ستون ہیں۔
وزارتِ خارجہ کے مطابق، یہ دورہ دونوں رہنماؤں کو بھارت-یو اے ای جامع اسٹریٹجک شراکت داری کے لیے نئی جہتوں پر غور کرنے کا موقع فراہم کرے گا۔ اس کے ساتھ ساتھ باہمی دلچسپی کے علاقائی اور عالمی امور پر خیالات کے تبادلے کا بھی امکان ہے، جہاں دونوں ممالک کے درمیان اعلیٰ درجے کی ہم آہنگی پائی جاتی ہے۔