وقف ترمیمی بل پر دو دنوں میں دوسری بار اپوزیشن اراکین کا احتجاجاً واک آؤٹ

کئی اپوزیشن ممبران پارلیمنٹ بشمول سنجے سنگھ، کلیان بنرجی، گورو گوگوئی، اے راجہ، محمد عبداللہ اور اروند ساونت نے منگل کو وقف بل پر مشترکہ کمیٹی کی میٹنگ سے واک آؤٹ کیا اور الزام لگایا کہ ان کے خلاف بھارتیہ جنتا پارٹی نے توہین آمیز تبصرہ کیا ہے۔ اپوزیشن ارکان پارلیمانی پینل کے اجلاس سے احتجاجاًواک آؤٹ کر گئے، جو وقف (ترمیمی) بل پر اقلیتی امور کی وزارت کے نمائندوں کی پیشکش کی سماعت کر رہا تھا۔ اپوزیشن ارکان تقریباً ایک گھنٹہ واک آؤٹ رہنے کے بعد دوبارہ میٹنگ میں شامل ہو گئے۔ تاہم، بی جے پی ارکان نے دعویٰ کیا کہ اپوزیشن ارکان کمیٹی کے چیئرمین جگدمبیکا پال کے ساتھ بدسلوکی کررہے ہیں۔ یہ مسلسل دوسرا دن ہے جب اپوزیشن ارکان نے اختلافات کے بعد اجلاس سے واک آو ٹ کیا۔
انڈیا ٹوڈے نے نامعلوم عہدیداروں کے حوالے سے رپورٹ کیا کہ وقف بورڈ میں خواتین کو شامل کرنے کی تجویز پر بی جے پی کے ممبران پارلیمنٹ نشی کانت دوبے، دلیپ سائکیا، ابھیجیت گنگولی، اور بنرجی اور گوگوئی کے درمیان گرما گرم بحث کے بعد تنازع شروع ہوا۔ انڈیا ٹوڈے کی خبر کے مطابق، اپوزیشن لیڈروں نے پینل کےچیئرپرسن اورتجربہ کار بی جے پی ایم پی جگدمبیکا پال پر قواعد کے مطابق کام نہ کرنے اور اپنی پارٹی کے اراکین کے خلاف کارروائی کرنے میں ناکام ہونے کا الزام لگایا۔ تاہم، بی جے پی ارکان پارلیمنٹ نے دعوی کیا کہ اپوزیشن ارکان پال کو گالی دے رہے ہیں۔