سورت:(فکروخبر/ذرائع) سورت کے کاپودرا علاقے میں واقع ایک ہیرا فیکٹری ‘انبھ جیمز’ میں اُس وقت سنسنی پھیل گئی جب واٹر کولر سے پانی پینے کے بعد تقریباً 150 کاریگروں کی طبیعت اچانک خراب ہو گئی۔ کئی مزدوروں نے چکر، متلی اور الٹی کی شکایت کی، جبکہ کچھ نے پانی میں عجیب بو کی نشاندہی کی۔
پولیس کی ابتدائی تفتیش میں کولر کے قریب سے سلفاس کا پیکٹ برآمد ہوا، جس کے بعد قتل کی کوشش کے تحت مقدمہ درج کر کے پانچ تفتیشی ٹیمیں تشکیل دی گئیں۔ اب تک 104 افراد کو کیرن اسپتال اور 14 کو ڈائمنڈ اسپتال میں داخل کرایا گیا ہے، جن میں سے دو کی حالت نازک ہے۔
اے سی پی وی آر پٹیل کے مطابق پولیس سی سی ٹی وی فوٹیج اور دیگر شواہد کی بنیاد پر جانچ کر رہی ہے کہ آیا یہ واقعہ کسی سازش کا حصہ ہے یا اتفاقی زہریلا پن۔
