بھٹکل (فکروخبر نیوز) اسٹوڈنٹس اسلامک آرگنائزیشن آف انڈیا (SIO) بھٹکل یونٹ کے زیرِ اہتمام "The Idea of India” کے عنوان سے دعوت سینٹر، سلطان اسٹریٹ میں ایک راؤنڈ ٹیبل ڈسکشن (Round Table Discussion) کا انعقاد کیا گیا، جس میں میڈیا سے وابستہ افراد نے شرکت کی۔ پروگرام میں قومی شناخت، آئینی اقدار، سماجی ہم آہنگی اور ایک باخبر و جامع معاشرے کی تشکیل میں میڈیا کے کردار پرتبادلۂ خیال کیا گیا۔
اس موقع پر ایس آئی او کرناٹک کے ریاستی صدر جناب عادی الحسن اور ریاستی جنرل سکریٹری جناب جوہر کاشف خصوصی طور پر شریک ہوئے۔ مقررین نے اپنے خیالات کا اظہار کرتے ہوئے کہا کہ ایک مضبوط، ترقی یافتہ ہندوستان کی تعمیر میں صحافیوں اور ذرائع ابلاغ کا کردار نہایت اہم ہے۔ انہوں نے کہا کہ میڈیا محض خبروں کی ترسیل کا ذریعہ نہیں بلکہ معاشرے میں مثبت سوچ اورسماجی شعور کو فروغ دینے کا مؤثر وسیلہ بھی ہے۔
مباحثے کے دوران شریک صحافیوں نے بھی اپنے خیالات کا اظہار کرتے ہوئے اس بات پر زور دیا کہ میڈیا کو سنسنی خیزی کے بجائے مثبت اور تعمیری صحافت کو فروغ دینا چاہیے۔ انہوں نے کہا کہ موجودہ حالات میں ایسی صحافت کی ضرورت ہے جو معاشرے میں اعتماد، رواداری اور باہمی احترام کو مضبوط کرے۔
شرکاء نے اس امر پر بھی زور دیا کہ مختلف طبقات اور کمیونٹیز کے درمیان فرقہ وارانہ ہم آہنگی، بھائی چارے اور باہمی اعتماد کے فروغ کے لیے مشترکہ کوششیں وقت کی اہم ضرورت ہیں۔ انہوں نے کہا کہ صحافی، سماجی تنظیمیں اور عوام اگر مشترکہ طور پر مثبت اقدار کو فروغ دیں تو ایک پرامن اور مضبوط معاشرہ تشکیل دیا جا سکتا ہے۔
