ریاض: یکم فروری سے سعودی عرب نے اپنی ویزا پالیسی میں بڑی تبدیلی کی ہے۔ اب ہندوستان سمیت 14 ممالک کے لیے ملٹی پل انٹری ویزا ختم کر دیا ہے۔
تفصیلات کے مطابق یکم فروری 2025 سے صرف سنگل انٹری ویزا جاری کیا جائے گا۔ ہر ویزا کی مدت 30 دن ہوگی البتہ حج، عمرہ، سفارتی ویزے اور رہائشی ویزے میں کوئی تبدیلی نہیں کی گئی۔
یہ نئی پالیسی الجزائر، بنگلہ دیش، مصر، ایتھوپیا، ہندوستان، انڈونیشیا، عراق، اردن، مراکش، نائجیریا، پاکستان، سوڈان، تیونس اور یمن کے وزیٹرز پر لاگو ہوگی۔
سعودی حکام نے ملٹی پل انٹری ویزا کے غلط استعمال کو اس تبدیلی کی سب سے بڑی وجہ قرار دیا ہے۔ ان کا کہنا ہے کہ بہت سے مسافر طویل مدت کے ویزے پر سعودی عرب آئے لیکن غیر قانونی طور پر کام کرنے لگے یا بغیر اجازت کے حج ادا کیا۔
حج کے دوران سعودی عرب میں بھیڑ کا مسئلہ بڑھ رہا ہے۔ 2024 میں 1200 سے زیادہ حاجی گرمی اور بھیڑ کی وجہ سے جاں بحق ہو گئے تھے۔
حکام کے مطابق ان میں سے کئی حاجی غیر رجسٹرڈ تھے جو ملٹی پل انٹری ویزے کے ذریعے سعودی عرب آئے تھے۔ اس تبدیلی کا مقصد غیر رجسٹرڈ حاجیوں کو سعودی عرب میں آنے سے روکنا اور حج کے دوران حفاظتی تدابیر کو بہتر بنانا ہے۔
سعودی حکومت نے ملٹی پل انٹری ویزے کے خاتمے کو عارضی اقدام قرار دیا ہے، تاہم اس پر دوبارہ نظر ثانی کرنے کا کوئی خاص وقت نہیں بتایا گیا۔
یہ تبدیلی انڈین ورک ویزا کے حوالے سے بھی اہم ہے۔ جنوری 2025 سے انڈین شہریوں کو سعودی ورک ویزا حاصل کرنے سے پہلے اپنے پیشہ ورانہ اور تعلیمی qualifications کی تصدیق کرانی ہوگی۔
