منگلورو (فکروخبرنیوز) خلیج بنگال میں بننے والے کم دباؤ کے باعث ریاست کرناٹک میں اگلے چار دنوں کے دوران انتہائی شدید بارش اور تیز ہوائیں چلنے کا قوی امکان ہے، جس کے پیش نظر ہندوستانی محکمہ موسمیات (IMD) نے بھٹکل سمیت ریاست کے ساحلی، شمالی اندرونی اور جنوبی اندرونی خطوں میں ریڈ، اورنج اور ایلو الرٹ جاری کر دیے ہیں۔
محکمہ موسمیات کی تازہ ترین اپڈیٹ کے مطابق منگلورو، اڈپی، اتر کنڑا کے ساحلی علاقوں سمیت بلگام، دھارواڑ، گدگ، کوپل، بلاری، میسور، منڈیا، چامراج نگر، بنگلورو اربن، بنگلورو ساؤتھ، بنگلورو رورل، کولار، چکبالاپور اور ٹمکورو اضلاع میں موسلادھار بارش کے ساتھ تیز رفتار ہوائیں چل سکتی ہیں۔
موسم کی مرحلہ وار پیش رفت کے مطابق 22 ستمبر کو باگل کوٹ، رائچور، کوپل، گدگ اور دکشن کنڑا اضلاع میں بارش کے خطرے کے مدنظر ایلو الرٹ دیا گیا ہے۔ جبکہ 23 ستمبر کو کلبرگی، وجے پورا، اڈپی، شیواموگا، چکمگلورو اور دکشن کنڑا کے لیے اورنج الرٹ اور بیدر، یادگیر، رائچور، باگل کوٹ، وجے نگرانگر، اتر کنڑا، چتردرگ اور ہاسن اضلاع کے لیے ایلو الرٹ جاری کیا گیا ہے۔ اس سلسلے میں 24 ستمبر کا دن ساحلی علاقوں کے لیے انتہائی اہم اور تشویشناک بتایا جا رہا ہے، جہاں محکمہ موسمیات نے دکشن کنڑا اور اڈپی کے لیے ریڈ الرٹ جاری کیا ہے کیونکہ ان ساحلی اضلاع میں طوفانی ہواؤں کے ساتھ انتہائی شدید بارش کی توقع ہے۔ اسی دن کوڈاگو، ہاسن، چکمگلورو اور اتر کنڑا میں اورنج الرٹ اور دیگر اضلاع میں ایلو الرٹ رہے گا۔ موسم کی ان بگڑتی صورتحال کے پیش نظر انتظامیہ اور محکمہ موسمیات نے عوام کو محتاط رہنے کی سخت ہدایت دی ہے اور ساحلی علاقوں کے ماہی گیروں کو بھی سمندر میں نہ جانے کا مشورہ دیا ہے۔
