بنگلورو(فکروخبرنیوز) کرناٹک کے محکمۂ اسکولی تعلیم نے پری یونیورسٹی کے امتحانی نظام میں تبدیلی کرتے ہوئے رواں تعلیمی سال سے فرسٹ پی یو سی کے طلبہ کے لیے ریاست بھر میں یکساں سالانہ امتحان منعقد کرنے کا فیصلہ کیا ہے۔ سیکنڈ پی یو سی کے بورڈ امتحانات کی طرز پر متعارف کرایا جانے والا یہ نظام تمام سرکاری، سرکاری امداد یافتہ اور غیر امداد یافتہ نجی پری یونیورسٹی کالجوں پر لاگو ہوگا۔
نئے نظام کے تحت سالانہ تحریری امتحانات مشترکہ ٹائم ٹیبل کے مطابق ہوں گے اور تمام کالجوں کے طلبہ کے لیے یکساں سوالیہ پرچے استعمال کیے جائیں گے۔ اب تک کالج اپنے سوالیہ پرچے تیار کرتے اور سالانہ امتحانات اپنے طور پر منعقد کرتے تھے۔ اس کے باعث مختلف کالجوں میں سوالیہ پرچوں کے معیار، ان کی مشکل کی سطح اور جوابی پرچوں کی جانچ کے معیار میں فرق رہتا تھا۔ محکمۂ تعلیم کے مطابق اس کا مقصد تعلیمی معیار بہتر بنانا اور ریاست بھر کے طلبہ کو یکساں امتحانی معیار فراہم کرنا ہے۔
کنڑ پربھا کی رپورٹ کے مطابق کرناٹک اسکول ایگزامینیشن اینڈ اسسمنٹ بورڈ (کے ایس ای اے بی) تمام کالجوں کے لیے مشترکہ امتحانی ٹائم ٹیبل اور ڈیجیٹل سوالیہ پرچے تیار کرے گا۔ بورڈ یہ ٹائم ٹیبل اور پرچے محکمۂ پری یونیورسٹی تعلیم کے ڈائریکٹر کو پیش کرے گا، جس کے بعد سوالیہ پرچے مقررہ شیڈول کے مطابق متعلقہ کالجوں کو بھیجے جائیں گے۔ پرچوں کی ترسیل کے دوران ان کی رازداری برقرار رکھنے کی ہدایت دی گئی ہے۔
عملی امتحانات بھی مقررہ شیڈول کے مطابق ہوں گے۔ ان کے انعقاد کی نگرانی متعلقہ ضلع کے ڈپٹی ڈائریکٹر کریں گے۔ کالجوں کو عملی امتحانات اور داخلی جانچ، دونوں کے نمبر مقررہ مدت کے اندر محکمہ کے مخصوص سافٹ ویئر میں درج کرنا لازمی ہوگا۔
جانچ کالجوں میں ہوگی، نتائج ضلع سطح پر منظور ہوں گے۔
تحریری امتحانات کے بعد جوابی پرچوں کی جانچ متعلقہ کالجوں میں ان کے پرنسپل کی نگرانی میں کی جائے گی۔ کالج نتائج مرتب کرکے متعلقہ ضلع کے ڈپٹی ڈائریکٹر کو تصدیق کے لیے پیش کریں گے۔ ڈپٹی ڈائریکٹر کی تصدیق اور منظوری کے بعد ہی کالج نتائج جاری کر سکیں گے۔




