بھٹکل (فکروخبر نیوز) آئی این ایف کی جانب سے 18 اور 19 جولائی کو ایم ایم صدیق ہال، بندر روڈ بھٹکل میں منعقد کیے جانے والے دو روزہ کارڈیک کیمپ کے لیے رجسٹریشن کا ہدف 1050 افراد مکمل ہوچکا ہے اور اب مزید رجسٹریشن کی کوئی گنجائش باقی نہیں رہی۔ اس بات کا اظہار ذمہ داران نے آج بعد نمازِ عشاء ساحل آن لائن کے دفتر میں منعقدہ پریس میٹ کے دوران کیا۔
اس موقع پر ذمہ داران نے کیمپ کے اغراض و مقاصد اور اس کے متوقع فوائد پر تفصیلی روشنی ڈالی۔ واضح رہے کہ اس خصوصی کیمپ میں جنوبی ہند کے تین معروف ماہرینِ امراضِ قلب اپنی ٹیموں کے ساتھ شرکت کریں گے، جبکہ 30 سے 35 افراد پر مشتمل طبی عملہ بھی خدمات انجام دے گا
آئی این ایف کے جنرل سکریٹری جناب عادل ناگرمٹ نے کہا کہ حالیہ برسوں میں خصوصاً نوجوانوں میں دل کے امراض اور اچانک دل کے دوروں کے واقعات میں اضافہ تشویش کا باعث بنا ہوا ہے۔ انہوں نے بتایا کہ آئی این ایف گزشتہ ڈیڑھ سال سے اس مسئلہ کا سنجیدگی سے جائزہ لے رہی ہے اور مذکورہ کیمپ اسی سلسلہ کی ایک اہم کڑی ہے۔ ان کے مطابق ادارہ کا مقصد عوام کو بروقت طبی معائنہ کی طرف راغب کرنا ہے تاکہ دل کے امراض کی بروقت تشخیص ممکن ہوسکے۔
انہوں نے واضح کیا کہ اس کیمپ کا مقصد کسی اسپتال یا ڈاکٹر کی تشہیر نہیں بلکہ خالصتاً عوامی خدمت ہے۔ آئی این چاہتی ہے کہ بھٹکل اور اس کے اطراف کے لوگ ڈاکٹروں سے رجوع ہونے کے لیے پس وپیش میں مبتلا ہونے کے بجائے ایک مرتبہ آگے آئیں اور اپنی صحت کے متعلق اطمینان حاصل کرنے کے لیے چیک اپ کرالیں۔ ان کے مطابق توقع تھی کہ تین سے چار سو افراد رجسٹریشن کرائیں گے، لیکن عوام اور مختلف اداروں کے ذمہ داران کی بھرپور دلچسپی کے نتیجہ میں رجسٹریشن کی تعداد ایک ہزار سے تجاوز کر گئی۔
عادل ناگرمٹ نے بتایا کہ کیمپ میں کالیکٹ کے معروف ماہرینِ امراضِ قلب ڈاکٹر علی فیصل اور ڈاکٹر سلمان صلاح الدین کے علاوہ منگلورو کے معروف کارڈیالوجسٹ ڈاکٹر یوسف کمبلے اپنی ٹیموں کے ساتھ شرکت کریں گے۔ مجموعی طور پر 30 سے 35 طبی ماہرین اور معاون عملہ اس کیمپ میں خدمات انجام دے گا۔ 18 جولائی کو ابتدائی طبی جانچ اور اسکریننگ ہوگی، جس کے بعد ضرورت مند مریضوں کا ماہر ڈاکٹروں کے ذریعہ تفصیلی معائنہ کیا جائے گا۔
سکریٹری اور کیمپ کے کنوینر جناب غفران لنکا نے کہا کہ ہم نے کیمپ کے سلسلہ میں مختلف اداروں کے ذمہ داران سے ملاقاتیں کیں اور انہوں نے ہمیں صحت کے میدان میں آگے بڑھنے کے مزید مشورے دیئے۔ خصوصاً جامعہ اسلامیہ بھٹکل کے ذمہ داران اور اساتذہ نے اس پر اپنی خوشی کا اظہار کرتے ہوئے چند ایسے مشورے ہمارے سامنے رکھے ہیں جن پر ہم آگے چل کر ہماری انتظامیہ میں بات کریں گے اور اس پر کام کرنے کی پوری کوشش کریں گے۔
انہوں نے بتایا کہ رجسٹریشن کا آغاز 8 جولائی کو کیا گیا تھا اور 12 جولائی سے قبل ہی تمام 1050 سلاٹس مکمل ہو گئے۔ انہوں نے کہا کہ رجسٹریشن کے لیے مزید گنجائش نہیں ہے، اگرچہ اب بھی مسلسل درخواستیں موصول ہو رہی ہیں۔
انہوں نے رجسٹریشن مکمل کرنے والے افراد سے اپیل کی کہ وہ 16 جولائی تک متعلقہ لیب میں اپنے خون کی جانچ ضرور کرالیں۔ مقررہ تاریخ تک ٹیسٹ نہ کرانے والوں کی رجسٹریشن منسوخ کردی جائے گی اور ان کی جگہ انتظار کی فہرست میں شامل دیگر افراد کو موقع فراہم کیا جائے گا۔
غفران لنکا کے مطابق اگر معائنہ کے دوران کسی مریض کو مزید علاج یا آپریشن کی ضرورت پیش آئے تو ڈاکٹروں کی جانب سے آپریشن مفت انجام دیا جائے گا، جبکہ اسپتال کے اخراجات میں بھی 30 تا 40 فیصد تک رعایت فراہم کی جائے گی۔
انہوں نے مزید بتایا کہ تعلیمی اداروں میں اساتذہ کی سہولت کے لیے رجسٹریشن اور خون کی جانچ کا انتظام ان کے اداروں ہی میں کیا گیا۔ اسی طرح شہر میں اپاہج بچوں کے لیے قائم وژڈم اسکول کے طلبہ و طالبات کو بھی اس کیمپ میں معائنہ کا خصوصی موقع فراہم کیا جائے گا۔
غفران لنکا نے کہا کہ دستیاب اعداد و شمار کے مطابق رجسٹریشن کروانے والے 1050 افراد میں سے 141 افراد ایسے ہیں جن میں دل کی بیماریوں کی علامات یا سابقہ تشخیص موجود ہے، جنہیں 19 جولائی کو خصوصی معائنہ کے لیے مدعو کیا گیا ہے۔
انہوں نے تمام رجسٹرڈ افراد سے اپیل کی کہ وہ اپنے مقررہ وقت سے 15 تا 20 منٹ قبل ایم ایم صدیق ہال پہنچیں تاکہ ابتدائی جانچ کا عمل بروقت مکمل کیا جا سکے، جبکہ غیر ضروری طور پر ایک یا دو گھنٹے قبل پہنچنے سے گریز کریں۔
ذمہ داران نے بتایا کہ اترا کنڑا کی ڈپٹی کمشنر لکشمی پریا سے بھی ملاقات کی گئی ہے اور سرکاری افسران کو اس کیمپ سے استفادہ کرنے کی دعوت دی گئی ہے۔
پریس میٹ میں آئی این ایف کے انتظامی رکن جناب تنویر موٹیا، ساحل آن لائن کے ایڈیٹر جناب عنایت اللہ گوائی، نائب مدیر اداری فکروخبر مولانا اظہر رکن الدین ندوی، رفیق فکروخبر مولانا عتیق الرحمن ڈانگی ندوی، بھٹکلیس کے سینئر رپورٹر مولانا عبدالسبحان ندوی اور جناب واصل شاہ بندری سمیت دیگر موجود تھے۔
