منگلورو، 29 دسمبر 2025: بھارتیہ جنتا پارٹی (بی جے پی) ضلع صدر ستیش کمپالا نے پیر کے روز اعلان کیا کہ پارٹی لیڈر جگنیواسا راؤ کو ایک سنگین معاملے کے سلسلے میں بی جے پی سے نکال دیا گیا ہے۔ یہ کارروائی اس الزام کے بعد عمل میں آئی ہے جس میں جگنیواسا راؤ کے بیٹے کرشنا جے راؤ پر پتور کی ایک نوجوان خاتون سے شادی کا وعدہ کر کے دھوکہ دینے کا الزام عائد کیا گیا ہے۔
منگلورو میں منعقدہ ایک پریس کانفرنس سے خطاب کرتے ہوئے ستیش کمپالا نے بتایا کہ جیسے ہی جگنیواسا راؤ کے بیٹے کے خلاف دھوکہ دہی کے الزامات منظر عام پر آئے، پارٹی نے فوری طور پر جگنیواسا راؤ کو نوٹس جاری کیا اور انہیں پارٹی کی تمام سرگرمیوں سے دور رکھا گیا تھا۔ انہوں نے کہا کہ جگنیواسا راؤ نے پارٹی قیادت کو یقین دہانی کرائی تھی کہ اگر الزامات قانونی طور پر ثابت ہو جاتے ہیں، بشمول ڈی این اے ٹیسٹ کے ذریعے تو وہ اس بات کو یقینی بنائیں گے کہ ان کا بیٹا متاثرہ خاتون سے شادی کرے۔ کمپالا کے مطابق اسی نوع کی یقین دہانی پتور کے ایم ایل اے اشوک کمار رائے کو بھی دی گئی تھی، تاہم بعد ازاں جگنیواسا راؤ اپنے وعدے پر عمل کرنے میں ناکام رہے۔
انہوں نے واضح الفاظ میں کہا کہ چونکہ جگنیواسا راؤ نے اپنے عہد کے مطابق عمل نہیں کیا، اس لیے پارٹی نے انہیں بی جے پی سے نکالنے کا فیصلہ کیا ہے۔ ستیش کمپالا نے مزید کہا کہ بی جے پی متاثرہ نوجوان خاتون کے لیے انصاف کو یقینی بنانے کے لیے اپنی کوششیں جاری رکھے گی اور اس معاملے میں کسی قسم کی نرمی نہیں برتی جائے گی۔
پریس کانفرنس کے موقع پر سابق میئر سدھیر شیٹی کنور، پارٹی لیڈر وسنت جے پوجاری، ارون جی شیٹ اور دیگر بی جے پی رہنما بھی موجود تھے۔