بھٹکل تنظیم کی مسلمانوں سے اپیل ، آج جمعہ کی نماز کے لیے پرسنل لا بورڈ کی گزارش پر کریں عمل ، اپنے بازو پر پٹی باندھ کر وقف ترمیمی بل کے خلاف درج کریں اپنا پرامن احتجاج

(فکرو خبر/پریس ریلیز) الحمد اللہ دہلی کے جنتر منتر اور پٹنہ کے دھرنا استھل پر مسلمانوں کے زوردار احتجاج نے کم از کم بی جے پی کی حلیف جماعتوں کی صفوں میں ہلچل مچادی ہے۔ اب 29 مارچ 2025 کو وجے واڑہ میں بھی ایک زوردار احتجاج ہونے جا رہا ہے۔
وقف ترمیمی بل 2025ایک گھناونی سازش ہے، جس کا واضح مقصد مسلمانوں کو ان کی مساجد، عید گاہوں ، مدارس، درگاہوں، خانقاہوں، قبرستان اور ان کے خیراتی اداروں سے انہیں محروم کرنا ہے۔ اگر یہ بل منظور ہوگیا تو ہمارے ہاتھ سے سینکڑوں مساجد، عید گاہیں، مدارس، قبرستان اور متعدد خیراتی ادارے نکل جائیں گے۔
لہذا ملک کے ہر مسلمان کی یہ ذمہ داری ہے کہ وہ اس پر اپنا بھرپور احتجاج درج کرائے۔ آل انڈیا مسلم پرسنل لا بورڈ ملک کے ہر مسلمان سے اپیل کرتا ہے کہ وہ جمعة الوداع کے موقع سے اپنے بازو پر کالی پٹی باندھ کر مسجد آئے اور اپنے غم و غصہ کا پرامن و خاموش مظاہرہ کرے۔
اس اعلان کے پیش نظر بھٹکل کی مجلس اصلاح و تنظیم نے بھی مسلمانوں سے گزارش کی ہے کہ وہ بورڈ کے اس مظاہرے میں شریک ہوں اور جمعہ کے لیے اپنے بازو پر کالی پٹی باندھ کر جائیں۔