بھٹکل (فکروخبر نیوز) بھٹکل کے تحصیلدار ناگیندر کولاشیٹی کے تبادلے کے بعد ہوناور کے تحصیلدار جناب پروین کاراندے نے جمعرات کے روز بھٹکل کے انچارج تحصیلدار کے طور پر اپنے عہدے کا چارج سنبھال لیا ہے۔ چارج سنبھالنے کے فوری بعد بھٹکل تعلقہ دفتر میں ایک استقبالیہ تقریب کا انعقاد عمل میں آیا، جہاں ڈپٹی تحصیلدار اور مختلف محکموں کے عملے نے نئے انچارج تحصیلدار کا استقبال کیا اور انہیں گلدستہ پیش کر کے مبارکباد دی۔
اس موقع پر موجودہ دفتری عملے اور افسران نے پروین کاراندے کو تعلقہ دفتر کی جاری ریوینیو کی انتظامی سرگرمیوں اور روزمرہ کے دفتری امور کے بارے میں تفصیلی معلومات فراہم کیں۔ توقع ہے کہ وہ بھٹکل تعلقہ میں مستقل تحصیلدار کے تقرر تک محکمہ مالگزاری کے تمام انتظامی امور اور عوامی خدمات کی نگرانی کریں گے۔
واضح رہے کہ پروین کاراندے بھٹکل کی انتظامیہ کے لیے نئے نہیں ہیں، وہ اس سے قبل بھٹکل سب ڈویژن کے انچارج اسسٹنٹ کمشنر (AC) کے طور پر بھی اپنی خدمات انجام دے چکے ہیں۔ علاقے سے ان کی واقفیت اور سابقہ تجربے کی وجہ سے امید ظاہر کی جا رہی ہے کہ محکمہ ریوینیو کے کام کاج بغیر کسی رکاوٹ کے خوش اسلوبی سے جاری رہیں گے۔
