بنگلورو (فکروخبر نیوز) ریاست کرناٹک کے ساحلی اور ملناڈ علاقوں میں موسم نے کروٹ لینا شروع کر دی ہے، جہاں آئندہ 24 گھنٹوں کے دوران گرج چمک کے ساتھ بارش اور آسمانی بجلی گرنے کا امکان ظاہر کیا گیا ہے۔ محکمۂ موسمیات نے ریاست کے کئی اضلاع کے لیے ایلوالرٹ کا انتباہ جاری کیا ہے۔
محکمہ موسمیات کے مطابق، ساحلی پٹی اور ملناڈ کے اضلاع میں خاص طور پر دوپہر اور شام کے اوقات میں درمیانی سے تیز بارش متوقع ہے۔ ماہرین کا کہنا ہے کہ خلیج بنگال میں بننے والے کم دباؤ کے نظام کے باعث موسمی حالات میں یہ تبدیلی آئی ہے، جس کا اثر جنوبی اندرونی کرناٹک، ساحلی علاقوں اور مغربی گھاٹوں پر واضح طور پر دیکھا جا رہا ہے۔
حالیہ دنوں کی شدید گرمی کے بعد اپریل کے آغاز میں ہونے والی یہ بارشیں عوام کے لیے کسی حد تک راحت کا باعث بنی ہیں۔ حکام نے احتیاطی تدابیر کے طور پر 14 سے زائد اضلاع کو الرٹ پر رکھتے ہوئے تیز ہواؤں اور آسمانی بجلی کے خطرات سے خبردار کیا ہے۔
دارالحکومت بنگلورو میں آئندہ چند دنوں کے دوران موسم ملا جلا رہنے کا امکان ہے۔ دن کے وقت ہلکی دھوپ جبکہ شام کے اوقات میں جزوی ابر آلودی اور کہیں کہیں ہلکی بارش متوقع ہے۔ درجہ حرارت زیادہ سے زیادہ 32 سے 34 ڈگری سینٹی گریڈ اور کم سے کم 21 سے 23 ڈگری سینٹی گریڈ کے درمیان رہنے کی پیش گوئی کی گئی ہے۔
محکمہ موسمیات نے 4 اپریل کو ساحلی کرناٹک، ملناڈ اور جنوبی اندرونی اضلاع کے مختلف علاقوں میں گرج چمک کے ساتھ بارش کے امکانات کے پیش نظر پیلا الرٹ برقرار رکھا ہے، اگرچہ بعض علاقوں میں بارش کم اور موسم نسبتاً خشک رہ سکتا ہے۔
مزید یہ کہ 10 اپریل کے بعد ریاست بھر میں بارشوں کی سرگرمیوں میں تیزی آنے کی پیش گوئی کی گئی ہے۔ اس دوران بیدر، کالابوراگی، وجئے پورہ، ہاسن، میسورو، منڈیا، کوڈاگو سمیت بنگلورو کے شہری و دیہی علاقوں میں بھی وسیع پیمانے پر بارش متوقع ہے۔
دریں اثنا، ماہرین نے عندیہ دیا ہے کہ جون کے مہینے سے ال نینو جیسے موسمی اثرات جنوبی مغربی مانسون کو متاثر کر سکتے ہیں۔
مجموعی طور جنوبی کنیرا، اڈپی، کوڈاگو، شیواموگا اور چکمگلورو جیسے اضلاع میں زیادہ بارش کے امکانات ہیں جبکہ بنگلورو اور اطراف میں وقفے وقفے سے بارش اور ابر آلود موسم برقرار رہنے کی توقع ہے۔