بنگلورو: بنگلورو میں ایک ٹریفک پولیس کانسٹیبل نے اپنی ذمہ داری کے ساتھ انسانیت کا خوبصورت مظاہرہ کرتے ہوئے روزہ دار مسافروں کی مدد کر کے عوامی سطح پر زبردست سراہنا حاصل کی ہے۔
یہ واقعہ اڈیگوڈی ٹریفک پولیس اسٹیشن کے دائرہ اختیار میں پیش آیا، جہاں پولیس اہلکاروں نے ایک کار کو روکا جس کی کھڑکیوں پر غیر قانونی سن فلم لگی ہوئی تھی۔ قواعد کے مطابق کارروائی کرتے ہوئے پولیس نے 1000 روپے جرمانہ عائد کیا، جسے مسافروں نے بلا کسی اعتراض کے ادا کر دیا۔
چیکنگ کے دوران شام کا وقت ہو چکا تھا اور افطار کا وقت قریب تھا، جبکہ مسافروں کے پاس روزہ کھولنے کے لیے کوئی انتظام موجود نہیں تھا۔ صورتحال کو بھانپتے ہوئے ٹریفک کانسٹیبل ناگراج نے فوری طور پر کھانے اور پانی کا انتظام کیا تاکہ مسافر وقت پر افطار کر سکیں۔
کانسٹیبل کے اس عمل کو قانون کی پابندی کے ساتھ ساتھ انسانی ہمدردی کی ایک بہترین مثال قرار دیا جا رہا ہے۔ سوشل میڈیا پر بھی اس واقعے کی خوب تعریف کی جا رہی ہے اور صارفین اس بات کو سراہ رہے ہیں کہ فرض اور انسانیت ایک ساتھ نبھائی جا سکتی ہے۔
مسافروں نے بھی اپنی غلطی تسلیم کرتے ہوئے پولیس اہلکار کا شکریہ ادا کیا اور کہا کہ اس کی مہربانی کو وہ ہمیشہ یاد رکھیں گے۔