بنگلورو کے علاقے ولسن گارڈن میں ایک دل دہلا دینے والا واقعہ پیش آیا جہاں 45 سالہ مکینک رشید پاشا کو اتوار 15 مارچ کی رات اس کے بچوں کے سامنے بے دردی سے قتل کر دیا گیا۔ اس افسوسناک واقعے نے شہر میں سنسنی پھیلا دی ہے۔
پولیس کے مطابق بڈا مکن روڈ پر تقریباً سات افراد کے ایک گروہ نے رشید پاشا کو گھیر لیا اور کرکٹ بیٹ سمیت دیگر کند ہتھیاروں سے اس پر حملہ کیا، جس کے نتیجے میں وہ موقع پر ہی دم توڑ گیا۔ حملہ اتنا شدید تھا کہ اسے بچنے کا کوئی موقع نہ مل سکا۔
واقعے کے دوران ایک راہگیر نے پوری واردات کی ویڈیو ریکارڈ کر لی، جو بعد میں سوشل میڈیا پر وائرل ہوگئی۔ ویڈیو میں صاف دیکھا جا سکتا ہے کہ ایک شخص بار بار کرکٹ بیٹ سے رشید پر وار کر رہا ہے جبکہ دیگر ملزمان اسے گھیرے کھڑے ہیں۔ اس ویڈیو کے منظر عام پر آنے کے بعد عوام میں شدید غم و غصہ پایا جا رہا ہے۔
پولیس کا کہنا ہے کہ ابتدائی تحقیقات کے مطابق یہ حملہ ایک سابقہ تنازعہ کا نتیجہ معلوم ہوتا ہے۔ بتایا جا رہا ہے کہ رشید پاشا نے مبینہ طور پر وقف املاک پر تعمیرات کا آغاز کیا تھا، جس پر ملزمان نے اعتراض کیا اور اسی سلسلے میں دن کے وقت دونوں فریقین کے درمیان جھگڑا بھی ہوا تھا۔ تاہم پولیس دیگر پہلوؤں، جیسے دھمکی یا بھتہ خوری، کو بھی مدنظر رکھتے ہوئے تفتیش کر رہی ہے۔
واقعے کے بعد ابھیشیک ایم ہکے ڈپٹی کمشنر آف پولیس (سنٹرل ڈویژن)، سمیت سینئر پولیس حکام نے جائے وقوعہ کا دورہ کیا اور شواہد اکٹھے کیے۔ پولیس نے قتل کا مقدمہ درج کر کے ملزمان کی تلاش شروع کر دی ہے۔