(فکروخبر /ذرائع)ڈونلڈ ٹرمپ کی تجارتی پالیسیوں اور عالمی تجارتی کشیدگی کے تناظر میں عالمی منڈی میں خام تیل کی قیمتوں میں نمایاں کمی دیکھنے میں آئی ہے۔
بین الاقوامی میڈیا رپورٹس کے مطابق برینٹ خام تیل کی قیمت 31 مارچ کو 74.74 ڈالر فی بیرل تھی، جو 2 اپریل تک معمولی اضافے کے بعد 74.95 ڈالر تک پہنچی، مگر اس کے بعد مسلسل کمی کا رجحان برقرار رہا اور اب یہ 60.12 ڈالر فی بیرل تک گر چکی ہے۔
ماہرین کے مطابق یہ کمی فی بیرل 14 ڈالر کی ہے، جو کہ عالمی مارکیٹ کے لیے اہم اشارہ ہے، خصوصاً ایسے وقت میں جب تجارتی جنگوں اور جغرافیائی کشیدگیوں نے عالمی معیشت کو متاثر کر رکھا ہے۔
توانائی کے تجزیہ کاروں کا کہنا ہے کہ اس غیر یقینی صورتحال کا اثر نہ صرف تیل کی قیمتوں پر پڑ رہا ہے بلکہ مستقبل کی توانائی پالیسیوں پر بھی اس کے دور رس اثرات مرتب ہو سکتے ہیں۔
