بھٹکل (فکروخبر نیوز) سماجی و فلاحی خدمات میں سرگرم بھٹکل مسلم یوتھ فیڈریشن (BMYF) کی جانب سے شہر میں پینے کے صاف پانی کی فراہمی کے لیے ایک اور اہم قدم اٹھاتے ہوئے چوتھے واٹر پلانٹ کا سنگ بنیاد رکھا گیا۔ پیر 26 اکتوبر 2026 کو جامعہ اسلامیہ بھٹکل کے سامنے جامعہ آباد روڈ پر واقع سیدنا ابراہیم جمعہ مسجد کے احاطے میں اس سلسلے میں ایک تقریب منعقد ہوئی، جس میں شہر کے علماء کرام، مختلف تنظیموں کے ذمہ داران اور سماجی شخصیات نے شرکت کی۔
اس موقع پر مہتمم جامعہ اسلامیہ بھٹکل مولانا مقبول احمد ندوی نے پینے کے صاف پانی کے نئے مرکز کا سنگ بنیاد رکھا اور منصوبے کی کامیابی، عوام کے لیے اس کی افادیت اور اس سے وابستہ تمام افراد کے حق میں خصوصی دعا فرمائی۔
تقریب سے خطاب کرتے ہوئے مولانا مقبول کوبٹے ندوی نے کہا کہ لوگوں کو پینے کا صاف اور محفوظ پانی فراہم کرنا اسلام کی تعلیمات کی روشنی میں ایک نہایت اہم اور افضل خدمت ہے۔ پانی انسانی زندگی کی بنیادی ضرورت ہے اور اس ضرورت کو پورا کرنے کے لیے آگے آنا ایک عظیم انسانی اور دینی خدمت ہے۔
انہوں نے بھٹکل مسلم یوتھ فیڈریشن کی سماجی سرگرمیوں کو سراہتے ہوئے کہا کہ یہ ادارہ مسلسل ایسے فلاحی منصوبوں کو عملی شکل دے رہا ہے جن سے عام لوگوں کو براہ راست فائدہ پہنچتا ہے۔ انہوں نے اس امید کا اظہار کیا کہ پینے کے صاف پانی کی فراہمی کا یہ منصوبہ بھی عوام کے لیے فائدہ مند ثابت ہوگا اور اس سے بڑی تعداد میں لوگ استفادہ کرسکیں گے۔
واضح رہے کہ بھٹکل مسلم یوتھ فیڈریشن کی جانب سے شہر میں پینے کے صاف پانی کے مراکز قائم کرنے کا سلسلہ جاری ہے اور سیدنا ابراہیم جمعہ مسجد کے احاطے میں قائم کیا جانے والا یہ چوتھا مرکز ہوگا۔ اس منصوبے کا بنیادی مقصد عوام کو صاف پانی کی سہولت فراہم کرنا اور ان علاقوں میں پانی کی ضرورت کو پورا کرنے میں تعاون کرنا ہے جہاں لوگوں کو اس سلسلے میں دشواریوں کا سامنا کرنا پڑتا ہے۔
اس تقریب میں مجلس اصلاح و تنظیم بھٹکل کے جنرل سیکریٹری مولوی عزیز الرحمن ندوی ، بھٹکل مسلم یوتھ فیڈریشن کے صدر مولانا وصی اللہ ندوی، جنرل سیکریٹری مبشر ہلارے، خازن رمیز کولا، سماجی امور کے سیکریٹری ظہیر شیخ اور الجامعہ کے اسپورٹس سیکریٹری سلیم الجی شریک تھے۔
اسی طرح سیدنا ابراہیم جمعہ مسجد کے صدر حافظ جمال حسین کاوا، تینگن گنڈی مرکزی جماعت المسلمین کے جنرل سیکریٹری عبداللہ دانش،صدر مدرسہ عربیہ تعلیم القرآن تینگن گنڈی جناب اقبال بنگالی، امام وخطیب سیدنا ابراہیم جمعہ مسجد مولانا اسماعیل ڈانگی ندوی اور امجد اِبّو سمیت دیگر ذمہ داران اور مقامی معززین بھی موجود تھے۔
