بھٹکل (فکروخبرنیوز) مرڈیشور کے ساحلِ سمندر پر ایک بڑا حادثہ اس وقت ٹل گیا جب سمندر کی لہروں میں ڈوبنے والے ایک سیاح کو لائف گارڈز نے بروقت کارروائی کرتے ہوئے بحفاظت باہر نکال لیا۔
موصولہ اطلاعات کے مطابق بحفاظت بچایا جانے والا نوجوان ریاست کے دارالحکومت بنگلورو کا رہائشی ہے، جس کی شناخت دلیپ کمار کے طور پر کی گئی ہے۔ بتایا جاتا ہے کہ دلیپ اپنے تین دوستوں کے ساتھ مرڈیشور بیچ کی تفریح کے لیے آیا ہوا تھا اور سمندر میں نہانے کے دوران اچانک تیز لہروں کے باعث گہرے پانی میں چلا گیا اور ڈوبنے لگا۔
ساحل پر موجود لائف گارڈز نے جب نوجوان کو سمندر میں مدد کے لیے ہاتھ پیر مارتے اور جدوجہد کرتے دیکھا، تو انہوں نے بلا تاخیر ہنگامی ریسکیو آپریشن شروع کر دیا۔ لائف گارڈز اور پولیس اہلکاروں نے اپنی جان جوکھم میں ڈال کر بروقت سمندر میں چھلانگ لگائی اور اسے بحفاظت ساحل پر واپس لے آئے، جس کی وجہ سے نوجوان کی قیمتی جان بچ گئی۔ لائف گارڈز اور ساحلی پولیس کی اس بروقت اور جرات مندانہ کارروائی کی عوام اور دیگر سیاحوں کی جانب سے شدید سراہنا کی جا رہی ہے۔
