منگلورو (فکروخبر نیوز) حکومتِ کرناٹک نے ضلع دکشن کنڑ کا نام تبدیل کر کے ‘منگلورو ضلع’ رکھنے کی تجویزپرعام شہریوں سے تحریری آراء، فیڈ بیک اور تجاویز طلب کی ہیں۔ اس سلسلے میں رائے جمع کروانے کی آخری تاریخ 30 اکتوبر 2026 مقرر کی گئی ہے۔
ریاستی حکومت نے اس حوالے سے باضابطہ نوٹیفکیشن جاری کرتے ہوئے عوام کو اپنی رائے پیش کرنے کی دعوت دی ہے۔ اس سے قبل منگلورو میں منعقدہ ریاستی کابینہ کے اہم اجلاس کے بعد نائب وزیر اعلیٰ ڈی کے شیوکمار نے دکشن کنڑ کے نام کی تبدیلی پر عوامی منشا معلوم کرنے کے فیصلے کا اعلان کیا تھا، جس پر اب عمل درآمد شروع کر دیا گیا ہے۔
نوٹیفکیشن کے مطابق شہری اور متعلقہ تنظیمیں 30 اکتوبر سے پہلے بذریعہ ای میل یا بالمشافہ تحریری شکل میں درج ذیل دفاتر میں اپنی آراء بھیج سکتی ہیں:
چیف منسٹر سیکریٹریٹ: روم نمبر 235، سیکنڈ فلور، ودھان سودھا، بنگلورو ([email protected])
ایڈیشنل چیف سیکریٹری (محکمۂ مالیات/ریونیو): روم نمبر 711، ساتویں منزل، ایم ایس بلڈنگ، بنگلورو ([email protected])
ڈپٹی کمشنر آفس دکشن کنڑ: پرجا سودھا، ضلع ایڈمنسٹریٹو سینٹر، پاڈیل، منگلورو ([email protected])
حکومت نے تمام دلچسپی رکھنے والے شہریوں اور حلقوں سے اپیل کی ہے کہ وہ مقررہ مدت کے اندر اپنی تجاویز روانہ کریں تاکہ نام کی تبدیلی کے اس اہم معاملے پر حتمی فیصلہ لیا جا سکے۔
