چنئی (فکروخبرنیوز) مجمع الامام الشافعی العالمي کے زیر اہتمام اور مجمع الامام الشافعی العالمي (فرع تامل ناڈو) کے زیر انتظام پانچواں شافعی فقہی سیمینار (الندوة الخامسۃ الفقھیۃ الشافعیۃ) ریاست تامل ناڈو کے دارالحکومت چنئی کے حج ہاؤس میں منعقد ہونے جا رہا ہے۔ یہ تین روزہ سیمینار 13 تا 15 ربیع الثانی 1448ھ مطابق 25 تا 27 ستمبر 2026ء بروز جمعہ تا اتوار منعقد ہوگا۔
اس اہم دینی و علمی سیمینار میں دورِ حاضر کے جدید درپیش مسائل پر تبادلہ خیال اور شرعی رہنمائی کے لیے چار اہم موضوعات کو بحث کے لیے طے کیا گیا ہے۔ سیمینار کے دوران درج ذیل امور زیر بحث آئیں گے:
مضاربت سے متعلق چند جدید مسائل
جمعہ اور نقلِ مکانی کے بعض اہم مسائل
سیر و تفریح سے متعلق بعض اہم سوالات
سونے کی خرید و فروخت سے متعلق چند جدید مسائل
سیمینار کے منتظمین کے مطابق اس علمی و فقہی اجتماع کا مقصد عصرِ حاضر کے معاشی، سماجی اور انفرادی مسائل کا شافعی فقہ کی روشنی میں حل پیش کرنا اور امتِ مسلمہ کی رہنمائی کرنا ہے۔ تینوں دن جاری رہنے والے ان اجلاسوں میں ملک و بیرون ملک کے جید علماء، ممتاز فقہاء اور اسلامی دانشور شرکت فرما کر اپنے مقالے پیش کریں گے۔
واضح رہے کہ اس سے قبل تلوجہ ممبئی ، کنڈلور ، کیرلا اور حیدرآباد میں چار سمینار کا کامیاب انعقاد ہوچکا ہے جس پر کئی جدید مسائل زیر بحث لاکر کئی تجاویز منظور کی جاچکی ہے۔ اسی طرح فکرِ شافعی پر دو روزہ سمینار تلوجہ کی عالیشان جامع مسجد میں منعقد ہوچکا ہے جس میں بھی ملک وبیرونِ ملک سے فقہاء کی شرکت ہوئی تھی۔
