بھٹکل (فکر و خبر/پریس ریلیز) مجلسِ اصلاح و تنظیم، بھٹکل نے عوام سے اپیل کی ہے کہ وہ 19 اور 20 ستمبر 2026 کو منعقد ہونے والی خصوصی ووٹر مہم سے بھرپور استفادہ کریں اور کرناٹک SIR 2026 کے تحت جاری کردہ مسودہ انتخابی فہرست (Draft Electoral Roll) میں اپنے نام اور دیگر تفصیلات کی جانچ ضرور کریں۔
خصوصی مہم کے دوران دونوں دن بوتھ لیول آفیسرز (BLOs) متعلقہ پولنگ اسٹیشنوں پر موجود رہیں گے، جو ووٹروں کو ان کے نام اور انتخابی تفصیلات کی جانچ، نئے اندراج، ضروری تصحیح اور دیگر متعلقہ کارروائی کے سلسلے میں رہنمائی فراہم کریں گے۔
مجلسِ اصلاح و تنظیم نے بالخصوص ان نوجوانوں سے اپیل کی ہے جو یکم اکتوبر 2026 تک 18 سال کی عمر مکمل کرلیں گے کہ وہ اپنا نام ووٹر لسٹ میں درج کروانے کے لیے ضروری کارروائی کریں۔ جن اہل افراد کے نام مسودہ انتخابی فہرست میں موجود نہیں ہیں، وہ اپنے متعلقہ پولنگ بوتھ پر جاکر BLO سے رابطہ کریں اور ضروری رہنمائی حاصل کریں۔
تنظیم نے تمام ووٹروں سے اپیل کی ہے کہ وہ اپنے نام کے ساتھ نام، عمر، پتہ اور دیگر انتخابی تفصیلات بھی احتیاط سے چیک کریں اور کسی قسم کی غلطی یا کمی کی صورت میں مقررہ طریقہ کار کے مطابق تصحیح یا ضروری درخواست جمع کریں۔
مجلسِ اصلاح و تنظیم نے خاندانوں سے بھی اپیل کی ہے کہ وہ بزرگ شہریوں اور ایسے افراد جنہیں انتخابی فہرست کی جانچ یا ضروری کارروائی میں مدد درکار ہو، ان کا تعاون کریں۔
مزید معلومات اور رہنمائی کے لیے عوام تَنظیم ہیلپ لائن سینٹر، BHM Arcade، اسپلیش کیفے کے قریب، بندر روڈ، بھٹکل سے رابطہ کرسکتے ہیں۔
جاری کردہ:
مبشر ہلارے
کنوینر، SIR کمیٹی
مجلسِ اصلاح و تنظیم، بھٹکل
