بنگلورو: کرناٹک میں بسوں کے ذریعے سفر کرنے والے کروڑوں مسافروں کے لیے ایک بڑی اور خوش آئند خبر سامنے آئی ہے۔ ریاست بھر میں عوامی ٹرانسپورٹ کے نظام کو جدید اور ڈیجیٹل بنانے کے لیے کرناٹک حکومت نے اپ گریڈ شدہ ‘KSRTC AWATAR 2.0’ پورٹل اور واٹس ایپ کے ذریعے ٹکٹ بکنگ سروس کا باضابطہ افتتاح کر دیا ہے۔ اس سہولت کے بعد اب مسافر گھر بیٹھے اپنے موبائل سے محض ایک واٹس ایپ پیغام کے ذریعے ریاست بھر کی سرکاری بسوں کی ٹکٹ بک کر سکیں گے۔
ریاستی حکومت کے 100 روزہ پروگرام کے حصے کے طور پر بنگلورو کے ودھان سودھا میں منعقدہ ایک تقریب کے دوران اس کا افتتاح کیا گیا۔ اس نئے اور جامع پورٹل کو ‘ون کرناٹک موبلٹی ایپ’ (One Karnataka Mobility App) کا نام دیا گیا ہے، جس میں ریاست کی چاروں اہم ٹرانسپورٹ کارپوریشنز یعنی ‘کرناٹک اسٹیٹ روڈ ٹرانسپورٹ کارپوریشن’ (KSRTC)، ‘بنگلورو میٹروپولیٹن ٹرانسپورٹ کارپوریشن’ (BMTC)، ‘نارتھ ویسٹرن کرناٹک روڈ ٹرانسپورٹ کارپوریشن’ (NWKRTC) اور ‘کلیان کرناٹک روڈ ٹرانسپورٹ کارپوریشن’ (KKRTC) کی ڈیجیٹل خدمات کو ایک ہی جگہ فراہم کر دیا گیا ہے۔
واٹس ایپ کے ذریعے ٹکٹ بکنگ کا آسان طریقہ: اب مسافر KSRTC، NWKRTC اور KKRTC کی بسوں کے لیے واٹس ایپ نمبر 6364940880 91+ میسیج بھیج کر ٹکٹ بکنگ کا عمل شروع کر سکتے ہیں۔ یہ ایک ہینڈلنگ سسٹم ہے جس میں مسافر اپنا ابتدائی مقام، منزل اور تاریخ منتخب کر کے بس کا انتخاب کر سکتے ہیں۔ UPI، کریڈٹ کارڈ، ڈیبٹ کارڈ اور ڈیجیٹل والیٹ کے ذریعے ادائیگی مکمل ہوتے ہی e-Ticket واٹس ایپ اور ای میل پر موصول ہو جائے گی۔ اس سہولت کے ذریعے مسافر اپنا PNR نمبر درج کر کے آن لائن ٹکٹ منسوخ (Cancel) بھی کر سکتے ہیں۔
