بنگلورو (فکروخبر نیوز) کرناٹک میں کانگریس حکومت کی مبینہ ناکامیوں اور کرپشن کے خلاف اپوزیشن بی جے پی کی جانب سے شروع کی گئی پاد یاترا پر وزیرِ اعلیٰ ڈی کے شیوکمار نے سخت ردِعمل ظاہر کرتے ہوئے شدید طنز کیا ہے۔ منگل کے روز صحافیوں سے بات کرتے ہوئے انہوں نے کہا کہ بی جے پی کی جانب سے اس طرح کے احتجاجی پروگراموں کے انعقاد سے دراصل کانگریس کو ہی فائدہ پہنچے گا، کیونکہ اس سے ہمیں اپوزیشن کے غلط پروپیگنڈے کا منہ توڑ جواب دینے کا بہترین موقع فراہم ہوتا ہے۔ انہوں نے اعلان کیا کہ کانگریس پارٹی بی جے پی کی اس پاد یاترا کے مقابلے کے لیے ایک جوابی اور مضبوط سیاسی لائحہ عمل تیار کرے گی۔
ڈی کے شیوکمار نے اپوزیشن کو یاد دہانی کراتے ہوئے کہا کہ "کانگریس کوئی کمزور پارٹی نہیں ہے؛ اس نے اپنی مسلسل تحریکوں اور قربانیوں کے ذریعے ملک کو آزادی دلائی ہے۔ جس وقت کانگریس ملک کی آزادی کے لیے جدوجہد کر رہی تھی، اس وقت بی جے پی نام کی کسی تنظیم کا وجود ہی نہیں تھا۔” واضح رہے کہ کرناٹک بی جے پی نے حکومت کی مبینہ پالیسیوں اور گھوٹالوں کے خلاف ضلع رائچور کے لنگسگور سے بلاری تک 10 روزہ اور تقریباً 185 کلومیٹر طویل ‘بلاری چلو’ پاد یاترا کا آغاز کیا ہے۔
ریاست میں خشک سالی کی صورتِ حال کا ذکر کرتے ہوئے انہوں نے بتایا کہ حکومت نے ابتدائی طور پر 101 تعلقات کو قحط زدہ قرار دے دیا ہے، جبکہ دیگر متاثرہ علاقوں میں زمینی حقائق کا جائزہ جاری ہے۔ انہوں نے کہا کہ مرکزی حکومت کے سامنے اپنے موقف کا مضبوطی سے دفاع کرنے کے لیے تمام رپورٹوں کا باریک بینی سے جائزہ لیا جا رہا ہے تاکہ کوئی فنی یا تکنیکی خرابی باقی نہ رہے۔ شیوکمار نے مزید بتایا کہ گدگ اور باگلکوٹ جیسے اضلاع سے شکایتیں موصول ہوئی ہیں جس کے لیے وہ خود ذاتی طور پر دورہ کر کے صورتِ حال کا معائنہ کریں گے۔
سینئر کانگریس قائد راہل گاندھی کے خلاف اترپردیش کے ہلدوانی میں درج کی گئی ایف آئی آر پر اپنا ردِعمل ظاہر کرتے ہوئے نائب وزیرِ اعلیٰ نے اسے سیاسی انتقام اور بدنیتی پر مبنی اقدام قرار دیا۔ انہوں نے کہا کہ راہل گاندھی نے کوئی غلط کام نہیں کیا، وہ اس ملک کے نوجوانوں اور عوام کے حقوق کی جنگ لڑ رہے ہیں۔ عوام کی آواز اٹھانا ان کا آئینی اور جمہوری حق ہے اور پوری کانگریس پارٹی مضبوطی کے ساتھ ان کے ساتھ کھڑی ہے۔
