بنگلورو (فکروخبر نیوز) پیغمبرِ اسلام حضرت محمد مصطفیٰ ﷺ کی سیرتِ طیبہ اور آپ ﷺ کی آفاقی تعلیمات کو عام کرنے کے مقصد سے جماعت اسلامی ہند کرناٹک نے اپنی سالانہ 11 روزہ ریاستی سیرت مہم کا آغاز کردیا ہے۔ امسال یہ مہم ’’حضرت محمد ﷺ: انقلاب کے مشعل بردار‘‘ کے عنوان سے چلائی جا رہی ہے، جس کے ذریعے ریاست کے مختلف طبقات تک امن، انصاف، رحم دلی، انسانی وقار اور باہمی اخوت کا پیغام پہنچانے کی کوشش کی جائے گی۔
بنگلورو میں منعقدہ پریس کانفرنس سے خطاب کرتے ہوئے جماعت اسلامی ہند کرناٹک کے امیرِ حلقہ ڈاکٹر محمد سعد بلگامی نے کہا کہ رسول اللہ ﷺ نے ایسا عظیم انقلاب برپا کیا جس کی بنیاد انسان کے اندرونی کردار اور ضمیر کی اصلاح سے رکھی گئی اور پھر یہی تبدیلی پورے معاشرے کی اصلاح کا ذریعہ بنی۔ انہوں نے کہا کہ موجودہ دور میں دنیا تشدد، ناانصافی اور مختلف قسم کے استحصال جیسے مسائل سے دوچار ہے، ایسے حالات میں سیرتِ نبوی ﷺ انسانیت کو امن، انصاف اور باوقار زندگی کا راستہ دکھاتی ہے۔
پریس کانفرنس کے دوران کنڑا زبان میں سیرتِ نبوی ﷺ سے متعلق دو کتابوں کا بھی اجراء عمل میں آیا۔ ان میں معروف کنڑا مصنف یوگیش ماسٹر کی کتاب ’’محمد ﷺ: انسانی ذہن کے کارساز اور دلوں کے فاتح‘‘ اور اے ایس پوتیگے کی مرتب کردہ ایک کتاب شامل ہے۔ جماعت اسلامی کے سکریٹری محمد کنہی اور محمد یوسف کنی نے بتایا کہ 11 روزہ مہم کے دوران اساتذہ، بیوروکریٹس، دانشوروں اور مختلف شعبوں سے وابستہ بااثر شخصیات سے براہِ راست رابطہ کیا جائے گا، جبکہ ریاست کے مختلف علاقوں میں سیمینار، مکالمے اور عمومی نشستیں بھی منعقد ہوں گی۔
انہوں نے مسلم برادری اور مساجد کے ذمہ داران سے اپیل کی کہ ربیع الاول کے موقع پر سیرتِ نبوی ﷺ کا معیاری لٹریچر برادرانِ وطن تک پہنچانے کی کوشش کی جائے، تاکہ نبی کریم ﷺ کی تعلیمات سے متعلق پائی جانے والی غلط فہمیوں کا ازالہ ہو اور معاشرے میں باہمی اعتماد، اخوت اور ہم آہنگی کو فروغ دیا جاسکے۔ پروگرام کی نظامت جماعت اسلامی کے میڈیا سکریٹری لبیب شفیع نے انجام دی۔
