بھٹکل (فکروخبر نیوز) علمی دنیا کے عظیم مرکز اور مصر کی مشہور یونیورسٹی ’’الازہر‘‘ میں بھٹکل کے چار طلبہ نے اپنی غیر معمولی تعلیمی کارکردگی کے ذریعے نہ صرف اپنے شہر بلکہ ہندوستان کا نام بھی روشن کیا ہے۔ دو طلبہ نے پی ایچ ڈی شعبۃ الأدب والنقد اور دو نے ماسٹرس کے امتحانات شعبۃ التفسیر میں شاندار نتائج حاصل کرتے ہوئے نمایاں کامیابی درج کی ہے۔ ان میں سے ایک طالب علم نے تو اپنے پورے شعبے میں اول مقام حاصل کرکے بھٹکل کے لیے ایک قابلِ فخر اعزاز حاصل کیا ہے۔
پی ایچ ڈی کے پہلے سال میں زیرِ تعلیم سید نبیغ ابن سید نور الہدیٰ برماورندوی نے 92 فیصد نمبرات حاصل کرتے ہوئے اپنے پورے شعبے میں پہلا جبکہ انظر ابن ابوبکر گوائی ندوی نے87 فیصد نمبرات حاصل کرکے دوسرا مقام حاصل کیا ہے۔ دونوں طلبہ نے اپنی علمی صلاحیت کا بھرپور مظاہرہ کرتے ہوئے الازہر جیسے عالمی علمی مرکز میں اپنی شناخت قائم کی ہے۔
اسی طرح ماسٹرس میں زیرِ تعلیم ابوبکر صدیق بن محمد صادق نائطے ندوی نے 92.11 فیصد اور محمد احمد ابن عبدالجلیل رکن الدین ندوی نے 83.77 فیصد نمبرات حاصل کیے۔ یوں بھٹکل سے تعلق رکھنے والے چاروں طلبہ نے اپنے اپنے تعلیمی مرحلے میں بہترین کارکردگی پیش کرتے ہوئے ایک ساتھ نمایاں کامیابی حاصل کی ہے۔
الازہر میں پی ایچ ڈی تک رسائی آسان نہیں
اپنی کامیابی کے حوالے سے مولوی سید نبیغ برماور ندوی اور اس کے ساتھی محمد انظر گوائی ندوی نے بتایا کہ جامعۃ الازہر میں پی ایچ ڈی میں داخلہ آسانی سے نہیں ملتا۔ ہندوستانی طلبہ عموماً بیچلرس سے اپنی تعلیم کا آغاز کرتے ہیں اور مرحلہ وار ماسٹرس کے بعد پی ایچ ڈی میں داخلہ حاصل کرتے ہیں۔ تاہم انہوں نے اور ان کے ساتھی انظر بن ابوبکر گوائی نے چنئی سے ماسٹرس مکمل کیا تھا اور وہاں بھی ان کے نتائج حوصلہ افزا رہے، جس کی بنیاد پر انہیں الازہر میں براہِ راست پی ایچ ڈی میں داخلہ حاصل کرنے کا موقع ملا۔
سید نبیغ برماور ندوی نے اپنی کامیابی کو اللہ تعالیٰ کا خصوصی فضل قرار دیتے ہوئے کہا کہ الازہر جیسے عالمی علمی مرکز میں پی ایچ ڈی کے لیے داخلہ ملنا اور پھر پہلے ہی سال پورے شعبے میں اول مقام حاصل کرنا اللہ تعالیٰ کا خاص فضل و کرم ہے۔
واضح رہے کہ ان طلبہ نے جامعہ اسلامیہ بھٹکل سے اپنے عالمیت کی تکمیل کی جس کے بعد دارالعلوم ندوۃ العلماء لکھنو سے فضیلت کی تعلیم مکمل کی ہے۔
بھٹکل کے ان چاروں طلبہ کی یہ کامیابی اس اعتبار سے بھی قابلِ ذکر ہے کہ دنیا کے قدیم ترین اور معتبر ترین اسلامی جامعات میں شمار ہونے والے الازہر میں انہوں نے اپنی علمی قابلیت کا لوہا منوایا ہے جس پر ان کے اساتذہ نے انہیں مبارکباد پیش کی ہے۔
فکروخبر بھٹکل میں ان چاروں طلبہ کو مبارکباد پیش کرتا ہے اور دعا گو ہیں کہ اللہ تعالیٰ انہیں مزید علمی میدان میں ترقی عطا فرمائے۔ آمین
