اڈپی (فکروخبر نیوز) کنداپور کے قریب مرونتھے ساحل سے دور بحیرۂ عرب میں ماہی گیری کی ایک کشتی حادثے کا شکار ہوکر سمندر میں غرق ہوگئی، تاہم قریب موجود دیگر ماہی گیری کشتیوں کے عملے کی بروقت کارروائی کے نتیجے میں کشتی پر سوار تمام چھ ماہی گیروں کو بحفاظت بچا لیا گیا۔
اطلاعات کے مطابق کوٹا کدری کے رہائشی کرشنا پتھرن کی ملکیت والی ماہی گیری کی کشتی ’سنچنا‘ 12 اگست کو مالپے بندرگاہ سے ماہی گیری کے لیے روانہ ہوئی تھی۔ 14 اگست کی رات گہرے سمندر میں سفر کے دوران کشتی کا نچلا حصہ کسی نامعلوم شے یا چٹان سے ٹکرا گیا، جس کے بعد کشتی میں تیزی سے پانی داخل ہونے لگا۔ حادثے کی اطلاع ملتے ہی قریب موجود ’برنداونا‘ اور ’گرو درشن‘ نامی دو کشتیوں کے عملے نے فوری طور پر موقع پر پہنچ کر امدادی کارروائی شروع کی اور کشتی میں سوار تمام ماہی گیروں کو بحفاظت نکال لیا۔
بعد ازاں ڈوبنے کے قریب پہنچ چکی کشتی کو گنگولی لائٹ ہاؤس سے تقریباً 12 ناٹیکل میل دور سے ساحل کی جانب کھینچنے کی کوشش کی گئی، تاہم سمندر میں تیز لہروں کے باعث رسی ٹوٹ گئی اور کشتی مکمل طور پر غرق ہوگئی۔ حادثے کے نتیجے میں کشتی، 2,500 لیٹر ڈیزل، GPS اور وائرلیس آلات، ماہی گیری کے جال اور تقریباً ڈھائی لاکھ روپے مالیت کی مچھلیوں سمیت تقریباً 45 لاکھ روپے کے نقصان کا تخمینہ لگایا گیا ہے۔ واقعے کے سلسلے میں گنگولی کوسٹل سیکیورٹی پولیس اسٹیشن میں مقدمہ درج کرکے مزید تحقیقات شروع کردی گئی ہیں۔
