کلکتہ ہائی کورٹ نے جمعرات کے روز مغربی بنگال حکومت سے ان دعووں پر سخت سوالات کیے ہیں جن میں کہا گیا تھا کہ پولیس ریاست بھر کی مساجد کو لاؤڈ اسپیکر ہٹانے کے لیے شفاہی ہدایات جاری کر رہی ہے۔ ایکٹنگ چیف جسٹس تپابرت چکرورتی اور جسٹس اتارو بانی جی پر مشتمل ڈویژن بینچ نے یہ برہمی وکیل دانش فاروقی کی جانب سے دائر کردہ ایک مفاد عامہ کی عرضی (PIL) پر سماعت کے دوران ظاہر کی۔ عرضی میں الزام لگایا گیا ہے کہ مختلف اضلاع میں حکام نے شور کی آلودگی (ریگولیشن اینڈ کنٹرول) رولز 2000 کے تحت آواز کی سطح (ڈیسیبل لیول) ناپے بغیر اور کوئی تحریری حکم جاری کیے بغیر مساجد اور دیگر عباد گاہوں کو لاؤڈ اسپیکر ہٹانے کا حکم دیا ہے۔
سماعت کے دوران پٹیشنر کے وکیل نے آئینی نکات کو اٹھاتے ہوئے عدالت کو بتایا کہ اذان اسلام کا ایک لازمی اور بنیادی حصہ ہے، جس کی حفاظت بھارتی آئین کا آرٹیکل 25 کرتا ہے۔ کسی بھی طرح کی غیر قانونی یا زبانی پابندی شہریوں کے بنیادی مذہبی حقوق کی براہ راست خلاف ورزی ہے۔ پٹیشنر کی جانب سے پیش ہونے والے سینئر ایڈوکیٹ اور ترنمول کانگریس کے رکن پارلیمنٹ کلیان بانی جی نے عدالت کو آگاہ کیا کہ پولیس انتظامیہ نے ریاست کی تقریباً 4,000 مساجد کی انتظامی کمیٹیوں پر زبردستی دباؤ ڈالا ہے کہ وہ تحریری نوٹس کے بغیر ہی لاؤڈ اسپیکر ہٹا دیں۔ انہوں نے وضاحت کی کہ قانون طے شدہ آواز کی حد کے اندر لاؤڈ اسپیکر کے استعمال کی اجازت دیتا ہے، لہٰذا سابقہ عدالتی نظائر کی روشنی میں اس کی اجازت برقرار رہنی چاہیے۔
دوسری طرف، ریاست کی نمائندگی کرتے ہوئے ایڈوکیٹ اے جی مترا نے عرضی کی مخالفت کی اور دعویٰ کیا کہ اس درخواست میں کوئی قانون سقم نہیں ہے اور اسے جرمانے کے ساتھ خارج کیا جانا چاہیے۔ ریاستی وکیل نے دلیل دی کہ درخواست میں کسی ایسی مخصوص مسجد کا نام شامل نہیں کیا گیا جہاں سے لاؤڈ اسپیکر ہٹائے گئے ہوں اور نہ ہی کوئی امام خود عدالت کے سامنے آیا ہے۔ اس پر ہائی کورٹ کی بینچ نے ریاست سے استفسار کیا کہ کیا وہ ان تمام الزامات کو مکمل طور پر جھوٹا قرار دیتی ہے؟ اس سوال کے بعد ریاستی وکیل نے حکام سے ہدایات حاصل کرنے کے لیے منگل تک کا وقت مانگ لیا۔
ہائی کورٹ کی بینچ نے فی الوقت ریاست کے خلاف لاؤڈ اسپیکر ہٹانے پر فوری عبوری اسٹے آرڈر جاری کرنے سے انکار کر دیا، کیونکہ درخواست میں کسی مخصوص واقعے کی ٹھوس تفصیل پیش نہیں کی گئی تھی۔ ہوگلی ضلع تک محدود عبوری راحت کی درخواست کو بھی عدالت نے فی الحال رد کر دیا۔ عدالت نے مقدمے کی سماعت ملتوی کرتے ہوئے حکومت کو ہدایت کی ہے کہ وہ آئندہ سماعت پر اس پورے معاملے میں اپنا سرکاری موقف واضح کرے۔
مذہبی آزادی اور آئینی حقوق کے تحفظ کے حوالے سے یہ مقدمہ انتہائی حساس نوعیت کا حامل ہے۔ قانونی ماہرین کا کہنا ہے کہ طے شدہ قانونی قواعد و ضوابط اور آواز کی پیمائش کی سائنسی طریقہ کار کو نظر انداز کر کے زبانی احکامات جاری کرنا بنیادی حقوق کی پامالی کے زمرے میں آتا ہے۔ اس کیس کے فیصلے کا اثر ریاست بھر کی عباد گاہوں کی قانونی حیثیت اور مذہبی آزادی کی عملی صورتحال پر مرتب ہوگا۔
