واشنگٹن ڈی سی / منگلورو (فکروخبر نیوز) کرناٹک کے وزیر صحت یو ٹی قادر فرید کی عوامی خدمات اور پیشہ ورانہ کارکردگی کو بین الاقوامی سطح پر ایک اہم اعزاز حاصل ہوا ہے۔ امریکہ کے ایوانِ نمائندگان (امریکی کانگریس) نے ان کی خدمات کو اپنے سرکاری کانگریس ریکارڈ (Congressional Record) میں شامل کر لیا ہے، جس کے بعد ان کی خدمات کا تذکرہ امریکی کانگریس کے مستقل ریکارڈ کا حصہ بن گیا ہے۔
واشنگٹن ڈی سی کے تاریخی کپیٹل ہال میں منعقدہ ایک تقریب کے دوران امریکی ایوانِ نمائندگان کی خارجہ امور کمیٹی کے رینکنگ رکن جوناتھن جیکسن نے یو ٹی قادر کو کانگریس ریکارڈ کی سرکاری دستاویزات پیش کیں۔ اس موقع پر انہوں نے امریکی کپیٹل ہال کی جانب سے یادگاری اعزاز "کانگریشنل چیلنج میڈلین” (Congressional Challenge Medallion) بھی انہیں پیش کیا۔
تقریب میں رکنِ کانگریس کے سینئر مشیر ڈاکٹر وجے جی پرابھاکر اور امریکن ملٹی ایتھنک کمیشن کے ایگزیکٹو ڈائریکٹر نوین چندرا کرنا بھی موجود تھے۔ اس موقع پر مقررین نے کہا کہ یو ٹی قادر کو حاصل ہونے والا یہ اعزاز عوامی خدمات کے اعتراف کی علامت ہے اور اس سے ساحلی کرناٹک کی نمائندگی کو بین الاقوامی سطح پر بھی ایک نئی شناخت ملی ہے۔
