ہنوئی/نئی دہلی (فکروخبر نیوز) ویتنام کے مشہور پھو کوک جزیرے (Phu Quoc Island) کے قریب ہفتے کے روز ایک دردناک اور افسوسناک حادثہ پیش آیا ہے، جہاں ہندوستانی سیاحوں کو لے جانے والی ایک کشتی اچانک سمندر میں الٹ گئی۔ ابتدائی اطلاعات کے مطابق اس حادثے میں کم از کم 15 ہندوستانی سیاحوں کی ہلاکت کا خدشہ ظاہر کیا جا رہا ہے، جن کی لاشیں نکالنے اور لاپتہ افراد کو تلاش کرنے کا کام جنگی بنیادوں پر جاری ہے۔ ویتنام میں موجود ہندوستانی سفارت خانے نے سوشل میڈیا پلیٹ فارم ‘ایکس’ پر اس المناک حادثے کی تصدیق کی ہے۔ سفارت خانے کا کہنا ہے کہ مقامی حکام کی مدد سے بڑے پیمانے پر سرچ اور ریسکیو آپریشن چلایا جا رہا ہے اور واقعے کی درست تفصیلات اور وجوہات کا پتہ لگایا جا رہا ہے۔
ہندوستانی سفارت خانے نے متاثرہ خاندانوں کی مدد اور معلومات کی فوری فراہمی کے لیے ہو چی منہ سٹی میں واقع کنسولیٹ جنرل آف انڈیا اور ہنوئی میں ہندوستانی سفارت خانے میں ہنگامی کنٹرول روم قائم کر دیے ہیں۔ ہو چی منہ سٹی کے کنٹرول روم سے +84 36 281 7930، +84 91 552 37 14 اور +84 33 452 0414 پر رابطہ کیا جا سکتا ہے، جبکہ ہنوئی کے کنٹرول روم کے لیے +84 91 308 9165 نمبر جاری کیا گیا ہے۔ ویتنامی حکام اور کوسٹ گارڈز جائے حادثہ پر امدادی کارروائیوں میں مصروف ہیں، جبکہ ہندوستانی سفارتی حکام مسافروں کی شناخت کے لیے مقامی انتظامیہ کے ساتھ مسلسل رابطے میں ہیں۔
