بھٹکل (فکروخبرنیوز) طلبہ اور عام لوگوں میں منشیات کے بڑھتے ہوئے رجحان اور اس کے مہلک اثرات کے خلاف بیدار کرنے کے مقصد سے اتر کنڑا ضلع پولس، بھٹکل شہر پولس اسٹیشن اور شری گیانیشوری بی ایڈ کالج کے اشتراک سے جمعرات کو ایک اہم بیداری پروگرام کا انعقاد کیا گیا۔
اس موقع پر شری گیانیشوری بی ایڈ کالج سے ایس سرکل تک ایک بیداری ریلی نکالی گئی۔ ریلی میں شامل طلبہ نے منشیات کے خلاف زبردست نعرے بازی کی اورعوام میں شعور بیدار کرنے کی کوشش کی۔ ریلی کے بعد منعقدہ اجلاس سے خطاب کرتے ہوئے بھٹکل شہر پولس اسٹیشن کے سی پی آئی دیواکر پی ایم نے کہا کہ منشیات کی لت ایک ایسی لعنت ہے جو طلبہ کی تعلیم، صحت اور ان کے روشن مستقبل کو برباد کر دیتی ہے۔ انہوں نے پرزور اپیل کی کہ طلبہ اور عام لوگ کسی بھی صورت میں اس لت سے دور رہیں۔
سی پی آئی نے مزید کہا کہ اگر کہیں بھی منشیات کی غیر قانونی اسمگلنگ یا اس کے استعمال سے متعلق کوئی اطلاع ملے تو فوری طور پر پولس محکمہ کو مطلع کریں۔ انہوں نے طلبہ کو مشورہ دیا کہ وہ معاشرے سے منشیات کے خاتمے کے لیے بیداری کے سفیر (برانڈ ایمبیسیڈر) بن کر کام کریں۔
اس پروگرام میں پی ایس آئی سومناتھ راٹھور، تھمپا ایس، پی ایس آئی روی گانڈیکر، پروبیشنری پی ایس آئی سدھو کرنال، کالج کے پرنسپل وشواناتھ بھٹ، وائس پرنسپل ناگراج مڈیوال، لکچرار گجانن شاستری سمیت پولس اہلکار اور طلبہ بڑی تعداد میں موجود تھے۔
