کاروار (فکروخبر نیوز) ہندوستانی محکمہ موسمیات (IMD) اور کرناٹک اسٹیٹ نیچرل ڈیزاسٹر مانیٹرنگ سینٹر (KSNDMC) بنگلورو کی پیشگوئی کے بعد اترا کنڑا ضلع انتظامیہ نے مون سون کے پیشِ نظر تمام احتیاطی تدابیر اور تیاریاں مکمل کر لی ہیں۔ محکمہ موسمیات کے مطابق ضلع میں 4 اور 5 جون کو درمیانی بارش، جبکہ 6 جون سے 10 جون 2026 تک شدید سے انتہائی شدید بارش ہونے کا قوی امکان ہے۔ اس صورتحال کے پیشِ نظر ضلع کلکٹر اور ڈسٹرکٹ ڈیزاسٹر مینجمنٹ اتھارٹی کی صدر کے لکشمی پریا نے ضلع بھر میں ہائی الرٹ جاری کر دیا ہے۔
ضلع انتظامیہ نے بارش اور سیلابی صورتحال سے نمٹنے کے لیے ضلع بھر میں 294 نگہداشت کے مراکز (ریلیف کیمپ) قائم کیے ہیں اور ہر مرکز پر نوڈل افسران کا تقرر کیا گیا ہے۔ جیولوجیکل سروے آف انڈیا (GSI) کی رپورٹ کے مطابق ضلع میں 439 مقامات کی نشاندہی کی گئی ہے جہاں لینڈ سلائیڈنگ (زمین کھسکنے) کا خطرہ ہے۔ ان مقامات کی مسلسل نگرانی کے لیے خصوصی اسپاٹرز (Spotters) تعیینات کیے جا رہے ہیں جن کی تربیت کا عمل جاری ہے۔ اس کے علاوہ مقامی بلدیاتی اداروں کی جانب سے نالوں اور ڈرینج سسٹم کی صفائی کا پہلا مرحلہ مکمل کر لیا گیا ہے۔ تمام سرکاری اسکولوں، آنگن واڑی مراکز، پرائمری ہیلتھ سینٹرز اور ہاسٹلز کی عمارتوں کی حفاظت کو یقینی بنانے کے لیے متعلقہ محکموں کو ہدایات جاری کر دی گئی ہیں۔ بی ایس این ایل اور ہیسکام (HESCOM) کو بھی بجلی اور مواصلاتی نظام کی بحالی کے لیے متبادل آلات کے ساتھ تیار رہنے کو کہا گیا ہے۔
ضلعی ڈیزاسٹر مینجمنٹ سینٹر (DEOC) کو 24 گھنٹے فعال کر دیا گیا ہے۔ عوام کی سہولت کے لیے ضلع اور تمام تعلقہ جات کے کنٹرول روم نمبرات جاری کیے گئے ہیں، تاکہ کسی بھی ہنگامی صورتحال میں فوری مدد پہنچائی جاسکے۔
