بھٹکل (فکروخبرنیوز) کرناٹک ہائی کورٹ کے دھارواڑ بنچ نے عوامی امن میں خلل ڈالنے کے الزام میں بھٹکل کے اسسٹنٹ کمشنر (اے سی) کی جانب سے جاری کردہ پانچ افراد کی ضلع بدری کے حکم کو منسوخ کر دیا ہے۔ عدالت کے اس فیصلے سے ملزمان کو بڑی راحت ملی ہے۔
تفصیلات کے مطابق مرڈیشور پولیس اسٹیشن کی حدود کے رہائشی پانچ افراد: راجو نائک، کیشو نائک، گنیش جینت نائک، گنیش بابو نائک اور بھاسکر مہادیو نائک کے خلاف کرناٹک پولیس ایکٹ کی دفعہ 54 سے 58 کے تحت کارروائی کی گئی تھی۔ بھٹکل اسسٹنٹ کمشنر نے 2 اپریل 2026 کو ایک حکم جاری کیا تھا جس میں ان افراد کو عوامی امن و امان کے لیے خطرہ قرار دیتے ہوئے ضلع بدر کرنے کی ہدایت دی گئی تھی۔
ملزمان نے اس فیصلے کو چیلنج کرتے ہوئے ہائی کورٹ کے دھارواڑ بنچ میں رٹ پٹیشن داخل کی تھی۔ کیس کی سماعت کے دوران ملزمان کے وکیل دتو نائک (ڈی جے نائک) نے دلائل پیش کیے۔ عدالت نے تمام دستاویزات اور فریقین کے دلائل کا تفصیلی جائزہ لینے کے بعد اے سی کے حکم کو غیر قانونی قرار دیتے ہوئے اسے مسترد کر دیا۔ ہائی کورٹ کے اس فیصلے کے بعد اب مذکورہ افراد پر سے ضلع بدری کا حکم کالعدم ہوگیا ہے۔
