انکولہ (فکروخبرنیوز) ضلع اترا کنڑ کے پولیس سپرنٹنڈنٹ نے انکولہ پولیس اسٹیشن کی حدود میں مسلسل غیر قانونی اور مجرمانہ سرگرمیوں میں ملوث ایک ملزم کے خلاف سخت کارروائی کرتے ہوئے اسے 6 ماہ کے لیے ضلع بدر کرنے کا حکم دیا ہے۔ ملزم کو اترا کنڑ سے بے دخل کر کے ضلع گلبرگہ منتقل کر دیا گیا ہے۔
ضلع بدر کیے گئے ملزم کی شناخت 41 سالہ شیام عرف شیام سندر گوپی ناتھ بھنٹ کے طور پر ہوئی ہے، جو انکولہ کے قصبہ کیٹی کا رہائشی ہے۔ پولیس ریکارڈ کے مطابق ملزم کے خلاف سنہ 2011 سے 2025 کے دوران انکولہ پولیس اسٹیشن میں کل 10 مقدمات درج کیے گئے تھے۔ پولیس کی جانب سے مسلسل نگرانی کے باوجود ملزم اپنی غیر قانونی سرگرمیوں سے باز نہیں آ رہا تھا۔
امن و امان کی صورتحال برقرار رکھنے اور عوامی مفاد کے پیشِ نظر، انکولہ پولیس انسپکٹر نے ملزم کی ضلع بدری کے لیے اسپیشل ایگزیکٹو مجسٹریٹ اور ایس پی اترا کنڑ کو ایک خصوصی تجویز ارسال کی تھی۔ فریقین کے دلائل سننے اور مکمل جانچ پڑتال کے بعد مجسٹریٹ نے 7 مئی 2026 کو ملزم کو فوری طور پر ضلع بدر کرنے کا حکم صادر کیا۔
حکم نامے کے مطابق ملزم کو اگلے چھ ماہ کے لیے ضلع گلبرگہ کے چوک پولیس اسٹیشن کی حدود میں رہنے کا پابند کیا گیا ہے۔ انکولہ پولیس کے عملے نے ملزم شیام کو گلبرگہ لے جا کر وہاں کے تھانہ انچارج کے سامنے حاضر کر دیا ہے۔ پولیس انتظامیہ کا کہنا ہے کہ اس کارروائی کا مقصد علاقے میں جرائم کی شرح کو کم کرنا اور قانون کی بالادستی برقرار رکھنا ہے۔
