گوکرنا: (فکروخبرنیوز) دنیا بھر میں اپنی خوبصورتی کے لیے مشہور سیاحتی مقام گوکرنا میں چیتے کی موجودگی نے مقامی باشندوں اور سیاحوں میں زبردست خوف و ہراس پیدا کر دیا ہے۔
اطلاعات کے مطابق گوکرنا کے مشہور ‘کڈلے بیچ’ (Kudle Beach) کو جانے والی مرکزی سڑک پر ایک چیتے کو گھومتے ہوئے دیکھا گیا ہے۔ یہ وہ راستہ ہے جہاں سے روزانہ ہزاروں کی تعداد میں ملکی و غیر ملکی سیاح گزرتے ہیں۔ بیچ سڑک پر چیتے کے آزادانہ گھومنے کی ویڈیوز سوشل میڈیا پر وائرل ہونے کے بعد علاقے میں سنسنی پھیل گئی ہے اور لوگ اس راستے سے گزرنے میں خوف محسوس کر رہے ہیں۔
ماہرین کا کہنا ہے کہ موسم گرما کی شدت اور بڑھتے ہوئے درجہ حرارت کی وجہ سے جنگلی جانور پانی اور خوراک کی تلاش میں بستیوں کا رخ کر رہے ہیں۔ اس صورتحال کے پیشِ نظر محکمہ جنگلات کے حکام نے احتیاطی تدابیر جاری کرتے ہوئے کہا ہے کہ سیاح اور مقامی لوگ بلا ضرورت تنہا باہر نہ نکلیں اور رات کے وقت خاص طور پر چوکنا رہیں۔
کڈلے بیچ پر ہمیشہ سیاحوں کی چہل پہل رہتی ہے، ایسے میں چیتے کی موجودگی کسی بڑے حادثے کا سبب بن سکتی ہے۔ مقامی لوگوں اور سیاحوں نے مطالبہ کیا ہے کہ کسی بھی ناخوشگوار واقعے سے قبل محکمہ جنگلات فوری طور پر حرکت میں آئے اور چیتے کو پکڑ کر دور دراز کے گھنے جنگلات میں منتقل کیا جائے تاکہ عوامی زندگی محفوظ رہ سکے۔
