منگلورو: ایئر انڈیا ایکسپریس کی دبئی سے منگلورو آنے والی پرواز میں ہفتہ کی شام مسافروں کو سخت پریشانی کا سامنا کرنا پڑا، جب لینڈنگ کے بعد انہیں معلوم ہوا کہ ان کا سامان ان کے ساتھ نہیں پہنچا اور دبئی میں ہی رہ گیا ہے۔
اطلاعات کے مطابق، پرواز کو دبئی سے دوپہر 12 بجے روانہ ہونا تھا، لیکن تاخیر کے بعد یہ تقریباً 2:30 بجے اڑی اور شام 7:20 پر منگلورو پہنچی۔ تاہم مسافروں کے لیے اصل دھچکا اس وقت لگا جب سامان وصولی کے دوران انہیں بتایا گیا کہ طیارہ میں گنجائش نہ ہونے کی وجہ سے کئی بیگ لوڈ ہی نہیں کیے گئے تھے۔
ایئر لائن کے عملے نے مسافروں کو یقین دلایا کہ گمشدہ سامان اتوار کی صبح دبئی سے اگلی فلائٹ پر منگلورو پہنچا دیا جائے گا اور براہ راست ان کے گھروں تک پہنچا دیا جائے گا۔ لیکن اس وضاحت نے مشتعل مسافروں کے غصے کو کم کرنے کے بجائے مزید بڑھا دیا۔
بعض مسافروں نے کہا، "اگر جگہ نہیں تھی تو ہمیں سوار ہونے سے پہلے ہی اطلاع دینی چاہیے تھی۔ ہم نے مکمل ٹکٹ کے ساتھ سفر کیا اور سامان کی رسید بھی ملی، پھر سامان پیچھے کیسے رہ گیا؟” کچھ مسافروں نے یہ بھی شکوہ کیا کہ ان کے بیگ میں کپڑے اور ضروری اشیاء موجود تھیں، جبکہ کئی افراد صرف ایک دن کے لیے سفر پر آئے تھے۔
ایک اور مسافر نے کہا، "آپ کہتے ہیں کل صبح بیگ پہنچ جائیں گے، لیکن کیا فائدہ جب ہمیں آج رات ہی واپس جانا ہے؟”
کچھ باقاعدہ مسافروں نے الزام لگایا کہ ایئر انڈیا ایکسپریس کے ساتھ اس طرح کے مسائل بار بار پیش آ رہے ہیں۔ ایک مسافر کے مطابق، "میرے ساتھ یہ تیسری یا چوتھی بار ہوا ہے۔” کئی مسافروں نے خراب ہونے والی اشیاء کے نقصان کی تلافی کا بھی مطالبہ کیا۔
ایئرپورٹ پر ایئر لائن کے عملے اور مسافروں کے درمیان لمبی بحث کے بعد، مسافروں سے ان کے رابطہ نمبر اور پتے لیے گئے تاکہ سامان پہنچنے پر گھروں تک پہنچایا جا سکے۔ تاہم، بیشتر مسافر جواب سے مطمئن نہیں دکھائی دیے اور ایئر لائن پر بدانتظامی کے الزامات عائد کیے۔
